Changbai
Changbaifjella (i Korea kalla Changbaekfjella) er ei fjellkjede langs grensa mellom Kina og Nord-Korea. Ho breier seg inn i dei kinesiske provinsane Jilin og Liaoning og dei nordkoreanske provinsane Ryanggang og Chagang. Dei fleste fjelltoppane er over 2 000 meter høge, mellom dei Paektusan med 2 744 moh.
Changbaifjella er habitat for eit stort tal sjeldne dyreartar, mellom dei bjørn, sibirtiger og amurleopard. Her veks òg den sjeldne koreatujaen. I Jilin er over 2 100 km2 av fjella verna gjennom naturvernområdet Changbai-shan.
I fylgje legendene vart Bukuri Yongson fødd mellom desse fjella. Han var urforfar til Nurhaci og den mandsjuiske kongsslekta Aisin Gioro, som grunnla Mandsjuria og Qingdynastiet i Kina.