Christian Olsson
John Christian Bert Olsson (fødd 25. januar 1980) er ein svensk, tidlegare friidrettsutøvar frå Göteborg som spesialiserte seg i tresteghopp. Han vart både olympisk meister, verdsmeister og to gongar europameister. Olsson vart svensk meister i tresteghopp fem gongar og ein gong i lengdehopp.
| Christian Olsson | |
|
| |
| Statsborgarskap | Sverige |
| Fødd | 25. januar 1980 (44 år) Göteborg |
| Idrett | friidrett |
| Tok del i | |
Aktiv endre
Olsson byrja som høgdehoppar. Han vart junior-europameister i øvinga i 1999, i tillegg fekk han sølv i tresteg-tevlinga i same meisterskapen. Sesongane 1999-2001 tok han medaljar i høgdehopp i den svenske senior-meisterskapen, i 2000 vart han svensk meister i tresteghopp for fyrste gong.
Det store gjennombrotet fekk Olsson i 2001 då han under verdsmeisterskapen i Edmonton for fyrste gong hoppa over 17 metter i tresteg og kom på sølvplassen, gullet tok Jonathan Edwards frå Storbritannia. Året etter slo han Edwards for fyrste gong og vart europameister i øvinga i München. I 2003 vart han suveren verdsmeister i Saint-Denis.
Vinteren 2004 sette Olsson verdsrekord innandørs med 17,83 m, då han vann hall-verdsmeisterskapen i Budapest. Under OL i Athen sigra han trestegfinalen på ny svensk rekord; 17,79 m, eit resultat som vart hans endeleg personlege rekord. Den 12. september vann han avslutningstevlinga i den såkalla «Golden League» og kunne dele gullpotten på 1 million US-dollar med Tonique William-Darling frå Bahamas, etter å ha vunne samtlege seks tevlingar i turneringa.
I 2005 var han skadd og deltok ikkje i VM, men året etter tok han sin andre EM-tittel i heimbyen Göteborg. Frå 2007-sesongen gjekk Olsson mykje skadd, og tevla berre i korte periodar. Han sleit også med å prestere på same nivå som han hadde gjort i sine beste sesongar.
Olsson vann trestegtevlinga i fem svensk meisterskap; 2000, 2001, 2003, 2009 og 2011. I 2006 vart han svensk meister i lengdehopp. Han noterte seg for fylgjande personlege rekordar; høgdehopp 2,24 m (2002), lengdehopp 7,69 m (2002) og tresteghopp 17,79 m (2004). Våren 2012 gjorde han kjent at han hadde lagt opp som friidrettsutøvar.
Medaljar og plasseringar i internasjonale meisterskap endre
- VM 2001 i Edmonton: Sølvmedalje – 17,47 m, bakom Jonathan Edwards (17,92 m)
- EM 2002 i München: Gullmedalje – 17,53 m, framom Charles Friedek (17,33 m)
- VM i 2003 i Paris: Gullmedalje – 17,72 m, framom Yoandri Betanzos (17,28 m)
- OL 2004 i Athen: Gullmedalje – 17,79 m, framom Marian Oprea (17,55 m)
- EM 2006 i Göteborg: Gullmedalje – 17,67 m, framom Nathan Douglas frå Stobritannia (17,21 m)
- VM 2011 i Daegu: Nr 6 – 17,23 m
Kjelder endre
- Denne artikkelen bygger på «Christian Olsson» frå Wikipedia på tysk, den 15. august 2013.
- Denne artikkelen bygger på «Christian Olsson» frå Wikipedia på svensk, den 15. august 2013.
Bakgrunnsstoff endre
- «Christian Olsson» (på engelsk). Olympedia. Henta 5. mars 2023.
- (en) Christian Olsson – Profil på nettsida til IAAF