Tormod Knutsen
Tormod Kåre Knutsen (7. januar 1932–23. februar 2021) var ein norsk kombinertrennar frå Eidsvoll som vann den olympiske gullmedaljen i kombinert under OL 1964 i Innsbruck. Han tok elles OL-sølv i 1960 og vart fire gongar noregsmeister i kombinert i tida 1959-64. Knutsen, som var medlem av Eidsvold Værk Skiklubb, vann kombinert-øvinga i Holmenkollen i 1958 og i Svenska skidspelen både i 1959 og -60.
| Tormod Knutsen | |
|
| |
| Statsborgarskap | Noreg |
| Fødd | 7. januar 1932 Eidsvoll kommune |
| Død |
23. februar 2021 (89 år) |
| Idrett | kombinert, skihopping |
| Tok del i |
Vinter-OL 1956, Nordic combined at the 1960 Winter Olympics, Nordic combined at the 1964 Winter Olympics |
| Utmerkingar | |
Aktiv endre
Knutsen vart noregsmeister i hopp for juniorar i 1950. Ettersom han dei neste sesongane ikkje makta nå noregstoppen i skihopp, satsa han frå 1955-sesongen på kombinertøvinga. I sin fyrste sesong tok han bronsen i noregsmeisterskapen, berre slått av Sverre Stenersen og Gunder Gundersen, dei to utøvarane som året før og i same rekkefylgje toppa resultatlista i verdsmeisterskapen på ski i Falun.
Knutsen deltok i 1956 i sitt fyrste av tre vinter-OL og kom på sjetteplass. Same sesongen vart det NM-sølv og andreplass i Lahti-spelen, begge gongane vart han slått av olympiameisteren Sverre Stenersen. Knutsen vart i 1958 nummer ni ski-VM i Lahti, men vann så sin fyrste store siger då han gjekk til topps i Holmenkollrenna. Året etter vart han noregsmeister i kombinert og vann øvinga i Svenska Skidspelen.
Under dei olympiske leikane i Squaw Valley i 1960 nådde Knutsen eit førebels høgdepunkt då han fekk sølvmedaljen i kombinert, berre slått av tyskaren Georg Thoma. Seinare i sesongen vann Knutsen kombinert i noregsmeisterskapen og tok sølv i hopptevlinga. Også i Svenska Skidspelen vart det siger.
Før 1962-sesongen vart den tidlegare OL-vinnaren Sverre Stenersen trenar for dei norske kombinertrennarane, og Gunder Gundersen tilsett som lagleiar. Denne satsinga gav full utteljing då Arne Larsen vart verdsmeister i Zakopane, med Ole Henrik Fagerås på bronseplass og Knutsen på fjerdeplass. Knutsen vann i 1963 sitt tredje og i 1964 sitt fjerde NM-gull i kombinert. Under dei olympiske leikane i Innsbruck i 1964 oppnådde han sitt absolutte høgdepunkt som kombinertrennar. Her vart han olympiameister i nordisk kombinert med stor margin.
Knutsen vart tildelt Holmenkollmedaljen i 1960. Han la opp i 1964.
Besteplasseringar i internasjonale meisterskap og renn endre
- 1956: Nr 2 i Lahti. Nr 6 i vinter-OL i Cortina d'Ampezzo
- 1957: Nr 5 i Holmenkollen
- 1958: Vinnar i Holmenkollen, nr 9 i ski-VM i Lahti
- 1959: Vinnar i Svenska Skidspelen i Falun
- 1960: OL-sølv i Squaw Valley. Vinnar i Svenska Skidspelen i Transtrand
- 1961: Nr 2 i Falun, nr 3 i Holmenkollen og nr 4 i Lahti
- 1962: Nr 2 i Falun og i Holmenkollen, nr 3 i Lahti og nr 4 i ski-VM i Zakopane
- 1963: Nr 2 i Holmenkollen og nr 3 i Falun
- 1964: Olympiameister i Innsbruck. Nr 3 i Svenska Skidspelen i Kiruna
Medaljar og besteplasseringar i noregsmeisterskap endre
- Ski-NM 1955: Bronsemedalje på Voss
- Ski-NM 1956: Sølvmedalje i Drammen
- Ski-NM 1957: Sølvmedalje i Mo i Rana
- Ski-NM 1958: Nr 5 i Oslo
- Ski-NM 1959: Gullmedalje på Gjøvik
- Ski-NM 1960: Gullmedalje i kombinert i Nedre Eiker og sølvmedalje i hopp
- Ski-NM 1961: Nr 5 i kombinert
- Ski-NM 1962: Bronsemedalje i Skien
- Ski-NM 1963: Gullmedalje i Rælingen
- Ski-NM 1964: Gullmedalje på Voss
Kjelder endre
- Sportsboken, aktuelle årgangar
- (en) Tormod Knutsen – Profil og resultatoversikt i olympiske konkurransar på sports-reference.com.
- (en) Tormod Knutsen – Profil og resultatoversikt hos FIS