Akutaq

Akutaq (alaskayupik, yugtunskrift ᐊᑯᑕᖅ) er ein matrett frå vestre Alaska og nordlege Canada. Ordet tyder 'noko blanda'. Tradisjonelt blei retten laga av piska feitt som ein blanda med bær, grøne blad eller kokt, most fisk.

Frosen akutaq laga med bringebær og blåbær.

Tradisjonelle feitt ein har brukt til å laga akutaq er feitt eller talg frå sel, karibu (rein), fisk eller fugl. I nyare tid har ein også teke i bruk kommersielle feittprodukt som Crisco. Tradisjonelle tilsetjingar er arktiske bær som tranebær, prydbringebær, krekebær, blåbær eller molte eller blad av til dømes syre (Rumex arcticus). Andre moglege tilsetningar er vatn, snø eller fisk. Nyare ingrediensar er sukker, mjølk, egg, rosiner, innkjøpte bær, hermetisk frukt eller potetstappe.

Den tradisjonelle retten er svært næringsrik ettersom ein blandar feitt med høgt A- og D-vitamininnhald med ingrediensar som inneheld mykje C- og E-vitaminar.

Akutaq laga med snø blir kalla snø-akutaq (snow akutaq). På engelsk er retten også kjend som Alaskan ice cream, Eskimo ice cream, Indian ice cream og Native ice cream.

• 
  Akutaq laga med bringebær, blåbær og vegetabilsk feitt.
• 
  Tumnaq, ein trebolle brukt til å laga akutaq.

Sjå òg

• Tolkusha
• Pemmican

Kjelder

• Denne artikkelen bygger på «Akutaq» frå Wikipedia på engelsk, den 1. mai 2017.