Al Perkins

Al Perkins (fødd 18. januar 1944) er ein USA-amerikansk gitarist mest kjend som steelgitarist. Gitarfabrikanten Gibson kalla Perkins «den viktigaste dobro-spelaren i vertda» og byrja å lage ein signaturversjon av ein dobro i 2001.

Al Perkins
Fødd	18. januar 1944 (80 år)
Fødestad	De Kalb i Texas i USA
Fødenamn	Albert Perkins
Opphav	USA
Aktiv	Sidan 1953
Sjanger	Folk, bluegrass, rock, countryrock, country, moderne kristen musikk
Instrument	Pedalsteelgitar, gitar, dobro, banjo, vokal
Tilknytte artistar	The Flying Burrito Brothers, Manassas, Stephen Stills Souther Hillman Furay Band, Desert Rose Band, Gram Parsons, The Nash Ramblers, Emmylou Harris, Dolly Parton
Verka som	Musikar, singer-songwriter, produsent

Tidlege år

Al Perkins vart fødd og voks opp i Texas og lærte seg å spele hawaiisk steelgitar ni år gammal. I 1950-åra vart Perkins rekna som eit vedunderbarn og spelte med regionale countryband, spelte på TV og radio, og vann fleire talentkonkurransar. Tidleg i 1960-åra byrja Perkins å spele elektrisk gitar med rockeband i Texas, og vart oppdaga av Mickey Jones og Kenny Rogers frå The First Edition. I 1966 var han i nasjonalgarden og var ferdig med militærtenesta i 1970.

1970-åra

I 1970 vart Perkins med i countryrockbandet Shiloh og flytta til California. Med i bandet var Don Henley og den framtidige produsenten og direktøren Jim Ed Norman. Perkins vart så leigd inn til å spele i ei ny utgåve av The Flying Burrito Brothers og spelte inn konsertalbumet The Last of the Red Hot Burritos i 1972. Perkins og Chris Hillman frå The Byrds, gjekk så til Stephen Stills sitt Manassas, som blanda latinamerikansk, rock, blues, country, folk og bluegrass. Han spelte òg steelgitar på The Rolling Stones-songen «Torn and Frayed» på Exile on Main St.

Medan Stills arbeidde med Crosby, Stills and Nash, slo Perkins og Hillman seg saman med Richie Furay (Buffalo Springfield og Poco) og J.D. Souther i Souther–Hillman–Furay Band. Perkins byrja med musikkproduksjon i midten av 1970-åra, men turnerte igjen med Michael Nesmith og McGuinn & Hillman. Som studiomusikar spelte Perkins på mange kjende album, som Eagles sittOn the Border.

Han vart med i det britiske bandet Ark i 1976 og spelte på albumet The Angels Come.

1980-åra

Perkins fortsette produksjonsarbeidet inn i 1980-åra og turnerte òg med Chris Hillman som ein duo, før han vart med i bandet til Dolly Parton i 1986, og turnerte og spelte inn plater med ho i fleire før han flytta til Nashville.

I Nashville skipa Perkins eit nytt prosjekt kalla The Nash Ramblers med Emmylou Harris, som han tidlegare hadde arbeidd med på dei to soloalbuma som Gram Parsons spelte inn. Live at the Ryman album gav Perkins den første Grammyprisen sin i 1992.

Sidan 1990-åra

Al Perkins har halde fram å turnere og spele inn musikk. Så langt har Al Perkins spelt med mellom andre James Taylor, Bob Dylan, Tori Amos, Garth Brooks, Dwight Yoakam, Dan Fogelberg, Joe Walsh, Mike Love, Solomon Burke, Patty Loveless, Cher, Rita Coolidge, Iris DeMent, Michael Martin Murphey, Buddy Miller og Jim Lauderdale.

Bakgrunnsstoff

• Offisiell nettstad

Kjelder

• Denne artikkelen bygger på «Al Perkins» frå Wikipedia på engelsk, den 5. desember 2018.
  • Wikipedia på engelsk oppgav desse kjeldene:
• Logan, Nick; Woffinden, Bob (1978). The Illustrated Encyclopedia of Rock. Ure Smith. ISBN 0-7254-0345-4. 
• Doggett, Peter (2000). Are You Ready for the Country. Viking. ISBN 0-6708-8938-5. 
• Hinton, Brian (2000). Country roads: How Country Came To Nashville. Sanctuary. ISBN 1-8607-4293-9. 
• Hunter, Dave (2012). Amped: The Illustrated History of the World's Greatest Amplifiers. Voyageur Press. ISBN 0-7603-3972-4.