Malik Harris

tysk-amerikansk songar og låtskrivar

Malik Harris (fødd 27. august 1997) er ein tysk popsongar, rappar og låtskrivar med amerikanske røter. I musikken kombinerer Harris pop og rap med element frå sjangrar som folk, rock og elektronisk musikk. Han representerte Tyskland i Eurovision Song Contest 2022 med sin sjølvskrivne song «Rockstars».

Malik Harris

Fødd27. august 1997 (26 år)
FødestadLandsberg am Lech
OpphavTyskland
Aktiv2018–
PlateselskapUniversal Music Group
Verka somsongar-låtskrivar
FarRicky Harris

Bakgrunn endre

Harris er fødd og vaks opp i Vilgertshofen nær Landsberg am Lech i Bayern.[1] Farfaren hans var operasongar, mens mormora var pianist. Harris er son av den amerikansk-fødde tv-programleiaren Ricky Harris, som også spelar ei rekkje musikkinstrument.[2]

Tidleg i tenåra byrja Harris å spele gitar og syngje coverlåtar. I tillegg til gitar lærte han seg å spele keyboard, trommemaskin og loopmaskin.[3] Førebileta hans er artistar som Ed Sheeran, Macklemore og Eminem, og han vert samanlikna med Bruno Mars.[3][4]

Harris gav ut sin fyrste singel, «Say the Name», i 2018, og oppfølgjersingelen «Welcome to the Rumble» året etter. Begge singlane fekk mange spelingar på airplaylister og strøymetenesta Spotify.[5] Suksessen skaffa han ein platekontrakt med Universal Music Group, og sommaren 2019 gav han ut EP-en Like That Again, etterfylgd av singelen «Home. Same vår heldt han sin fyrste soloturné, og han har også vore oppvarmingsartist for internasjonale musikarar som James Blunt, Alex Clare, Jeremy Loops, Tom Odell og den amerikanske songaren LP.[5][6]

Harris var den fyrste tyske songaren som fekk sin eigen Times Square-plakat i New York i ei veke, i samband med utgjevinga av singelen «When We've Arrived» i oktober 2020.[7] Han gav også ut Black Lives Matter-hymna «Faith», og han slapp debutalbumet Anonymous Colonist i august 2021.[5]

I mars 2022 vann Harris den tyske songtevlinga Germany 12 Points med sin eigenskrivne låt «Rockstars». Han vann tevlinga og representerte Tyskland i finalen i Eurovision Song Contest 2022 i Torino i Italia laurdag 14. mai 2022, der han enda på sisteplass av 25 deltakarland med seks poeng; alle frå publikumsrøystene.[5]

Diskografi endre

Studioalbum endre

  • 2021 – Anonymous Colonist

EP-er endre

  • 2019 – Like That Again
  • 2020 – When We've Arrived

Singler endre

  • 2018 – «Say the Name»
  • 2019 – «Welcome to the Rumble»
  • 2019 – «Home»
  • 2020 – «Crawling»
  • 2020 – «Faith»
  • 2021 – «Bangin' on My Drum»
  • 2021 – «Dance»
  • 2021 – «Time for Wonder»
  • 2022 – «Rockstars»

Referansar endre

  1. «Malik Harris: Sohn von Talk-Ikone Ricky Harris startet als Sänger durch». bild.de (på tysk). 24. januar 2021. Henta 5. mars 2022. 
  2. «Malik Harris fährt zum Eurovision Song Contest nach Turin». SWR3.de (på tysk). Henta 5. mars 2022. 
  3. 3,0 3,1 Vanessa Patrick, Bayerischer Rundfunk (21. februar 2019). «Vorgestellt // Malik Harris: Die wortgewaltige Hitmaschine» (på tysk). Henta 5. mars 2022. 
  4. Braun, Mathias. «Wie Malik Harris aus Issing die Popwelt erobern will». Augsburger Allgemeine (på tysk). Henta 5. mars 2022. 
  5. 5,0 5,1 5,2 5,3 «It's 'Rockstars' to Turin – Malik Harris wins in Germany! 🇩🇪». Eurovision.tv (på engelsk). 4. mars 2022. Henta 5. mars 2022. 
  6. «Germany has decided: Malik Harris to Eurovision 2022 with "Rockstars"». Eurovisionworld (på engelsk). 4. mars 2022. Henta 5. mars 2022. 
  7. «Amazon Music zeigt Malik Harris am Times Square». beta.musikwoche.de. Henta 5. mars 2022.