Tajmyrøya

Tajmyrøya (russisk Остров Таймыр, Ostrov Tajmyr) er ei stor øy langs kysten av Karahavet i Russland. Ho er 33 km lang og i snitt om lag 10 km brei. Øya ligg vest for Tajmyrbukta i eit område med mange skjer vest for Tajmyrhalvøya. Det smale sundet mellom Tajmyrøya og kysten av Sibir heiter Proliv Tajmyrskij og er om lag 3 km breitt.

Tajmyrøya
øy
Land	Russland
Del av	Nordenskiöldøyane
Areal	350 km²
Folketal	0
Tajmyrøya 76.2°N 96.116666666667°E / 76.2; 96.116666666667
Wikimedia Commons: Taymyr Island

Plasseringa til Tajmyrøya i Karahavet, sør for Nordenskiöldøyane.

Kysten av Tajmyrøya og nokre av dei større naboøyane, som Nansenøya, Bonevi og Pilota Makhotkina er forreven med mange viker. Sunda mellom Tajmyrøya og naboøyane er òg noko labyrintaktig. Geologisk er alle desse kystøyane ei fortsetjing av Nordenskiöldøyane som ligg lenger nord.

Havet omkring Tajmyrøya er dekt av pakkis med noko polynja gjennom den lange og bitre vinteren og det er sjølv isflak i farvatnet om sommaren.

Tajmyrøya høyrer til Krasnojarsk kraj og er ein del av Det store arktiske statlege naturreservatet, det største naturreservatet i Russland og Europa.

Historie

I oktober 1900, under den skjebnesvangre siste ekspedisjonen til Baron Eduard von Toll, vart det oppretta vinterkvarter for skipet hans «Zarja» på Nabljudenijøya og det vart bygd ein forskingsstasjon her. Dette er ei lita granittøy som ligg sørvest for Tajmyrøya i bukta som Baron Toll kalla Bukhta Kolin Artsjera (Colin Archer-bukta), etter skipsverftet der «Zarja» vart bygd.

På mange kart står Tajmyrøya berre oppført som Tajmyra. Ho må ikkje forvekslast med øya Malyj Tajmyr, som ligg i Laptevhavet utanfor søraustkysten av Severnaja Zemlja.

Kjelder

• Denne artikkelen bygger på «Taymyr Island» frå Wikipedia på engelsk, den 10. august 2008.
  • Wikipedia på engelsk oppgav desse kjeldene:
    • Plassering
    • William Barr, Baron Eduard von Toll’s Last Expedition, 1900-1903.
    • Tajmyrøya og nærrligande øyar Arkivert 2012-02-09 ved Wayback Machine.
    • Naturreservat Arkivert 2010-08-11 ved Wayback Machine.