Pauli Nevala
Pauli Lauri Nevala (fødd 30. november 1940 i Pojo) er ein finsk tidlegare friidrettsutøvar. Han vart olympiameister i spydkast i 1964. Fem år seinare fekk han sølvmedalje i EM i friidrett.
| Pauli Nevala | |
 Pauli Nevala på sigerspallen under Sommar-OL 1964 | |
| Statsborgarskap | Finland |
| Fødd | 30. november 1940 (83 år) Pojo |
| Yrke | spydkastar, friidrettsutøvar |
| Høgd | 177 centimeter |
| Pauli Nevala på Commons | |
Aktiv endre
Nevala slo gjennom i 1961-sesongen då han først vart finsk meister, og sidan sette finsk rekord med eit kast på 84,23 m.
I 1964 skadde han eit auge under i ei bilulykke i Mexico, slik at han ikkje kunne trene fram til august månad. Under OL 1964 i Tokyo vann han overraskande gullmedaljen med eit kast på 82,66 m, hans lengste kast for sesongen. Under OL 1968 vart han utslått i kvalifiseringa.
Han deltok i tre europameisterskap. I 1962 vart han utslått i kvalifiseringa og i 1966 vart han nummer fire. Under EM 1969 i Aten presterte han heile 89,58 m i sitt bestekast, noko som gav han sølvmedaljen bak den sterke sovjet-latviaren Janis Lusis.
Nevala deltok i alle sesongar i mange tevlingar. I 1969 var han med i 48 tevlingar og passerte 80-meterstreken i 41 av dei. I 1970 stilte han opp i 54 tevlingar, i fem av dei kasta han spydet over 90 m. Hans lengste kast i 1970-sesongen kom i Helsingfors den 6. september, i ein landskamp mot Sverige. Der slengde han spydet 92,64 m, det lengste kastet i verda det året og berre seks cm bak landsmannen Jorma Kinnunen sin verdsrekord.
Etter at Nevala i 1970 uttalte til den svenske avisa Aftonbladet at han kravde minst 800 svenske kroner for å delta i stemne, innleidde IOK-presidenten Avery Brundage granskingar om moglege brot på amatørvedtektene. Ved sesongopninga i april 1971 i Abidjan pådrog Nevala seg ein skulderskade, og vart tvinga til å leggje opp. IOC innstilte då sine granskingar.
Medaljar og plasseringar i internasjonale meisterskap endre
- Europameisterskapen 1962 i Beograd - utslått i kvalifiseringa
- Olympiske sommarleikar 1964 i Tokyo - gullmedalje, 82,66 m
- Europameisterskapen 1966 i Budapest - 4. plass, 80,36 m
- Olympiske sommarleikar 1968 i Mexico by - utslått i kvalifiseringa (14. plass, 77,90 m)
- Europameisterskapen 1969 Aten - sølvmedalje, 89,58 m
Personlege rekordar og årsbeste endre
| År | 1960 | 1961 | 1962 | 1963 | 1964 | 1965 | 1966 | 1967 | 1968 | 1969 | 1970 |
| Lengde (m) | 72,56 | 84,23 | 80,80 | 86,33 | 82,66 | 80,04 | 82,72 | 84,54 | 84,92 | 91,40 | 92,64 |
Kjelder endre
- Norsk, finsk og tysk wikipedia
- Friidrott, aktuelle årgangar. Hälsingborg.