Tuss og Troll

Tuss og Troll er ein norsk teikneserie basert på eventyr. Teikneserien gjekk i Norsk Barneblad i tidsrommet 1944 - 1955. Sidan 1945, unnateke 1947, har Tuss og Troll kome som julehefte.

Innhald

I starten var det norske folkeeventyr som vart teikna. Fyrste eventyret som var teikna, både i Norsk Barneblad og i juleheftet, var «Mons Raudskjegg». Seinare har det og vorte brukt eventyr av H.C. Andersen og frå 1001 natt. Likeeins er det brukt stoff frå lokale eventyrsamlingar.

Tekstskrivarar

• Øyvind Dybvad, 1945-55 og 1993-2001
• Johannes Farestveit, 1956-86
• Olav Norheim, 1987
• Anders Kvåle Rue, 1987
• Velle Espeland, 1992-99
• Gard Espeland, 2000-02

Nokre år var fleire av desse saman om teksta.

Teiknarar

Øyvind Dybvad, som stod bak ideen om teikneserien, fekk Jens R. Nilssen som teiknar. Han teikna så lenge serien gjekk i Norsk Barneblad. Frå juleheftet i 1956 overtok Solveig Muren Sanden. Ho teikna trolla snillare enn Jens R. Nilssen. Han teikn troll og miljø i ein stil inspirert av Theodor Kittelsen. Siste åra har Håkon Aasnes teikna saman med Solveig Muren Sanden.

Kjelde

• Knut A Brandal «Tuss og Troll - teikna eventyr» i Tuss og Troll Jula 2008
• aasentunet.no