Hans Svendsgård
Hans Svendsgård (19. juli 1937–15. juli 1996) var ein norsk fiskebåtreiar og -skipper frå Meløy. Han representerte Nordland fylke og partiet Høgre på Stortinget i tida 1981-89.
| Hans Svendsgård | |
| Statsborgarskap | Noreg |
| Fødd | 19. juli 1937 Meløy |
| Død | |
| Yrke | politikar, fiskar |
| Språk | norsk |
| Politisk parti | Høgre |
Svendsgård var son til ein fiskebåtreiar. Sjølv gjekk han etter realskule 1951/52 om bord i fiskebåten, før han tok eksamen ved maskinistskule i 1955 og skipperskule 1956. Frå 1958 til 1981 var han skipper på eigen fiskebåt.
Gjennom 1970-åra engasjerte Svendsgård seg i politikken, mellom anna som kommunestyrerepresentant i Meløy perioden 1972-75. Han var 1971-74 medlem og 1974-82 formann i Notfiskarsamskipnaden. Åra 1979-84 var han elles styreformann for Bodø-avdelinga i Statens Fiskarbank.
Hausten 1981 vart Svendsgård vald inn på Stortinget frå Nordland, og han vart attvald i 1985. På Tinget hadde han alle åtte sesjonane plass i Sjøfarts- og fiskerikomiteen, leiar av komiteen frå 1985 til 1989.
Etter han gjekk ut av Stortinget, var Svendsgård fiskerisjef i Nordland frå 1990 til han døydde i 1996.