Heini Messner

Heinrich Messner, kjend som Heini Messner, (1. september 1939–19. oktober 2023) var ein austerriksk skirennar frå Obernberg am Brenner i Tirol. Han vann to OL-bronsar og ein VM-bronse under dei olympiske leikane i 1968 og 1972. Messner vart nummer to i Verdscupen i alpine greiner 1967.

Heini Messner
Statsborgarskap	Austerrike
Fødd	1. september 1939 Obernberg am Brenner
Død	19. oktober 2023 (84 år)
Yrke	alpinist
Språk	tysk
Høgd	176 centimeter
Heini Messner på Commons

Aktiv

Frå 1961 til -67 vann Messner fem austerrikske meistertitlar. Han vart fyrst utformeister i 1961, deretter vann han slalåm tre år på rad, 1964-66, og til sist sigra han i den nasjonale meisterskapen i storslalåm i 1967.

Messner OL-debuterte på heimegrunn i Tirol med ein tiandeplass i utfor under Vinter-OL 1964 i Innsbruck. To år seinare vart han nummer fire i same øvinga då VM i alpine greiner 1966 vart avvikla i chilenske Portillo.

Den 5. januar 1967 vann Messner det aller fyrste rennet i verdscupen i alpine greiner. Rennet vart avvikla i Berchtesgaden i Vest-Tyskland. Sigeren vart hans i einaste i verdscupen, men fram til 1972 tok han 17 gongar steget opp på sigerspallen. I verdscupsesongen 1967 enda han på andreplasse etter suverene Jean-Claude Killy frå Frankrike.

Under dei olympiske leikane i Grenoble i 1968 tok Messner bronsemedaljen i storslalåm og vart nummer nummer fire i utfor. Desse prestasjonane, samt ein delt 13. plass i slalåm gav han VM-bronse i kombinasjonen, ei øving som ikkje stod på OL-programmet.

I VM i alpine greiner 1970 i Val Gardena vart Messner nummer fire i storslalåm. To år etter tok han bronsemedaljen i utfor då vinterleikane 1972 fann stad i Sapporo.

Trenar

Messner var 1972-74 trenar for Austerrike sitt landslag for kvinner.

Kjelder

• Sportsboken, aktuelle årgangar
• Denne artikkelen bygger på «Heinrich Messner» frå Wikipedia på tysk, den 10. desember 2014.