Herbert Wimmer
Herbert Wimmer (fødd 9. november 1944) er ein tysk tidlegare fotballspelar som var fødd i Eupen i dåverande Tyskland, i dag i Belgia. Han vart europameister med Vest-Tyskland i 1972 og verdsmeister 1974. Wimmer, som var offensiv midtbanespelar, vann elles fem bundesligatitlar og UEFA-cupen 1975 med Borussia Mönchengladbach i tida 1970-77.
 | |||
| Personleg informasjon | |||
|---|---|---|---|
| Fullt namn | Herbert Wimmer | ||
| Fødselsdato | 9. november 1944 (79 år) | ||
| Fødestad | Eupen i Belgia | ||
| Høgd | 179 cm | ||
| Posisjon | Midtbanespelar | ||
| Seniorkarriere* | |||
| År | Lag | Kampar | (Mål) |
| 1966-1978 | Borussia M'gladbach | 366 | (51) |
| Landslag | |||
| 1968-1976 | Vest-Tyskland | 36 | (4) |
| * Seniorklubbkampar og mål berre telt for nasjonal liga | |||
Klubbspel
endre21 år gammal gjekk Wimmer i 1966 frå amatørlaget Borussia Brand til Borussia Mönchengladbach, ein klubb som i 1965 hadde rykt opp i bundesligaen. Trenaren Hennes Weisweiler var då i ferd med å byggje opp eit mannskap som skulle stå i fremste rekke i vesttysk klubbfotball i 1970-åra. Våren 1970 sikra Mönchengladbach seg sin fyrste ligatittel, ein prestasjon laget gjentok året etter. I mai 1973 tapte Wimmer og Borussia UEFA-cupfinalen mot Liverpool FC. Ein månad seinare gav Wimmer Borussia leiinga i den vesttyske cupfinalen som enda med med Borussia-siger 2-1 over FC Köln. I 1975 tok Borussia seg til finalen i UEFA-cupfinalen på ny. Etter ein mållaus kamp på heimebane mot Twente, rundspelte Borussia det nederlandske laget på borterbane og vann 5-1. Åra 1975-77 tok Mönchengladbach tre rake ligapokalar. Våren 1977 tapte Borussia finalen i europacupen mot Liverpool FC, ein kamp der Wimmer gjekk ut med skade midtvegs i fyrste omgang.
Landslagsspel
endreWimmer deltok i 36 landskampar for Vest-Tyskland i tida frå hausten 1968 til EM-finalen 1976. I EM-finalen 1972 i Brussel skåra han det andre målet då Vest-Tyskland slo Sovjetunionen 3-0, hans fyrste av i alt fire landslagsmål. Under verdsmeisterskapen 1974 på heimebane deltok Wimmer i to kampar, sist i mellomrunda mot Jugoslavia. I sin siste landskamp, EM-finalen 1976 mot Tsjekkoslovakia som Vest-Tyskland tapte etter straffeskyting, vart han bytta ut allereie i pausen.
Merittar
endre- Verdsmeister: 1974 for Vest-Tyskland
- Europameister: 1972 for Vest-Tyskland
- EM-sølv: 1976 for Vest-Tyskland
- Vinnar av UEFA-cupen: 1975 med Borussia Mönchengladbach
- Vesttysk seriemeister: 1970, 1971, 1975, 1976, 1977 med Borussia Mönchengladbach
- DFB-pokalen: 1973 med Borussia Mönchengladbach
- Finaletap i Europacupen: 1977 med Borussia Mönchengladbach
Kjelder
endre- Denne artikkelen bygger på «Herbert Wimmer» frå Wikipedia på tysk, den 22. august 2018.