Magnus Hesselberg
Magnus Hesselberg (11. juni 1804–22. januar 1877) var ein norsk sakførar, gardbrukar, skipsreiar og stortingsmann frå Tjølling. Iver Magnussen Hesselberg var far hans.
| Magnus Hesselberg | |
| Statsborgarskap | Noreg |
| Fødd | 11. juni 1804 |
| Død |
22. januar 1877 (72 år) |
| Far | Iver Magnussen Hesselberg |
Magnus Hesselberg var frå 1819 elev på konstruksjonsskulen i Fredriksværn. Sidan tok han over styringa av Hølens verft ved Larvik, der far hans var medeigar. I 1833 tok han norsk juridisk eksamen og fekk arbeid som underfut i Larvik. Frå same året byrja ein 44 år lang periode som forstandar for stiftinga Larvik hospital. Hesselberg var fut i Larvik 1840-45 og «oppebørselsbetjent» i Larvik og Sandefjord 1845-46. Etter å ha budd ei tid i Larvik, flytta han til farsgarden i Tjølling og var både gardbrukar og skispsreiar, i tillegg til sitt vyrkje som sakførar ved underretten.
Frå 1850 til 1871 var Hesselberg ordførar for heradsstyret i Tjølling. Han var også formann i matrikkelkommisjonen i Tjølling, og medlem i matrikkelkommisjonen for Jarlsberg amt. I 1855 stod han i spissen for skipinga av Tjølling sogneforening og var ein del år formann i foreininga.
I tida 1851-69 representerte Hesselberg jamt og samt Jarlsberg og Larvik amt på Stortinget. Han var i 1851 sekretær i Kyrkjekomiteen og visesekretær i Odelstinget, i 1854 og 1857 sekretær både i Lagtinget og i Næringskomite nr 2, og på Omframtstortinget 1858 var han framleis sekretær i Lagtinget. Etter å ha sagt frå seg val i 1859, kom han på ny inn att på Stortinget 1865-66 og fekk att vervet som sekretær i Næringskomite nr 2. I si siste stortingsperiode, 1868-69, var han atter sekretær i Lagtinget og elles medlem i Næringskomite nr 1. Han sa i 1871 nei til å verte vald for ein ny stortingsperiode.
Hesselberg døydde på garden sin i Tjølling, 72 år gammal.
Kjelder
endre- Lindstøl, Tallak: Stortinget og Statsraadet 1814-1914. Kristiania, 1914