Olga Topp
Olga Christiane Topp (1. desember 1872–13. september 1961) var, som mangeårig innehavar og drivar av Hjorten Revy- og Varietéteater, ein markant skikkelse i restaurant- og underhaldingslivet i Trondheim. Ho var også ei tid eigar av Britannia Hotel i same by.
| Olga Topp | |
 | |
| Fødenamn | Olga Christiane Skattebo |
| Statsborgarskap | Noreg |
| Fødd | 1. desember 1872 Fredrikshald |
| Død |
13. september 1961 (88 år) |
| Yrke | restauratør, teatersjef |
Biografi endre
.jpg)
Olga Topp var dotter av skipstømmermannen Niels Christensen Skattebo[1] og Marte Bolette Olsdatter.[2] Ho blei 20. februar 1893 gift i Treeiningskyrkja i Kristiania[3] med den tre år eldre tyskaren Fritz (Carl Friedrich) Topp. I 1894 kom dei til Trondheim, der Fritz Topp fekk jobb som portier og overkelner på Britannia Hotel. I 1898 kjøpte han lyststaden «Hjorten» i bydelen Ila, og familien, som no talde to vaksne og to søner, flytta dit.[4]
Eit intervju med Olga Topp i Adresseavisen i 1952,[5] og avisomtaler av ho i samband med fødselsdagar og utmerkingar, handlar i stor grad om «Hjorten», som blei eit internasjonalt kjent revy- og varietéteater i hennar og mannen si tid som eigarar og drivarar. Dei fekk rive[6] det gamle sommaretablissementet, fekk ført opp ei ny restaurantbygning i drakestil, og opna for heilårsdrift. Allereie 17. mai 1899 kunne nye Hjorten opne. Arkitekt for bygginga var Karl Norum.[7]
Samstundes med at dei dreiv sitt mangfaldige teater i Hjorten, kjøpte ekteparet Topp i 1912 Britannia Hotel. Olga Topp stod som aksjeeigar, og Fritz Topp var administrerande direktør.[4] Hotellet blei seld vidare i 1924.[8]
I deira tid som eigarar hadde Hjorten artistar og gjestar frå inn- og utland. Etter at Fritz Topp døydde i 1920, dreiv Olga Topp staden vidare, trass i fleire år med nedgangstider. Den siste revyen blei vist i samband med jubileumsfeiring i 1948. Restauranten blei driven vidare i fleire år, men i august 1955 stengde Olga Topp dørene også for denne delen av drifta. I 1961 blei den karakteristiske bygninga rive for å gje plass for Ila forsamlingshus og aldersbustadar. Olga Topp hadde då flytta frå staden og same haust, i september 1961, døydde ho.[4]
Olga Topp var formann i Hotell- og restaurantfagets kvinneforening, og var i fleire år viseformann i Trondhjem og omegns hotell- og restaurantforeining. Året før ho fylte 60 år blei ho tildelt heidersteikn frå denne foreininga «for sin levende interesse i faget og organisasjonen».[9]
I 1953 blei Topp utnemnd til æresmedlem av Nordenfjeldske Hotell- og Restaurantforening, og fekk overrekt ein æresmedalje som teikn på utnemninga.[10]
Referansar endre
- ↑ Folketelling 1875 for 0101P Fredrikshald prestegjeld, Tellingskrets: 001a, Bosted by: 0041 Sølvgaden
- ↑ SAO, Halden prestekontor Kirkebøker, F/Fa/L0009: Ministerialbok nr. I 9, 1866-1877, s. 64
- ↑ "Norway Marriages, 1660-1926", database, FamilySearch (https://familysearch.org/ark:/61903/1:1:NWSP-RRF : 20 February 2020), Olga Kristiane Skattebo in entry for Carl Friedrich Topp, 1893.
- ↑ 4,0 4,1 4,2 Mona, Marte (2004). «Olga Topp (1872–1961)». Berømte og gløymde TRONDHEIMSKVINNER. Det Norske Samlaget. s. 125–128. ISBN 8252162150.
- ↑ Adrian (psevd.) (28. november 1952). «80 år – Fru Olga Topp i Hjorten …». Adresseavisen.
- ↑ I enkelte kjelder står det berre at dei fekk byggje om, ikkje rive, den eksisterande bygninga
- ↑ Maliks, Leif (25. februar 2020). «Karl Norum». Norsk biografisk leksikon (på norsk bokmål). Henta 7. mars 2020.
- ↑ «Britannia Hotel». Trondhjems Historiske Forening (på norsk bokmål). 12. april 2017. Arkivert frå originalen 28. april 2020. Henta 7. mars 2020.
- ↑ N.N. (1. desember 1932). «60 år : fru Olga Topp». Adresseavisen.
- ↑ N.N. (27. april 1953). «Æresmedalje til fru Olga Topp». Adresseavisen: 3. «Hotellfagets «grand old lady» her i Trondheim, fru Olga Topp, ble på årsmøtet i Nordenfjeldske Hotell- og Restaurantforening innvotert som æresmedlem av foreningen …»
- Denne artikkelen bygger på «Olga Topp» frå Wikipedia på bokmål, den 9. mars 2024.