Gunnar Halvorsen

Gunnar Halvorsen (24. juli 1945–6. mars 2006) var ein norsk næringsdrivar og politikar frå Åmli. Han representerte Aust-Agder og Arbeidarpartiet på Stortinget frå 1993 til 2005, og var vararepresentant i perioden 1985-93.

Gunnar Halvorsen
Fødd	24. juli 1945 Arendal
Død	6. mars 2006 (60 år)
Statsborgar av	Noreg
Parti	Arbeidarpartiet
Yrke	politikar
Alle verv	stortingsrepresentant (1993–1997) vararepresentant til Stortinget (1985–1989) vararepresentant til Stortinget (1989–1993) stortingsrepresentant (1997–2001) stortingsrepresentant (2001–2005)

Halvorsen var son til ein bakar. Han tok eksamen på elektrolina ved Risør yrkesskole i 1962 og ved Arendal maskinistskole i 1964. Deretter gjekk han Sørlandets tekniske fagskole i Grimstad og tok i 1968 fagbrev som elektromontør. Sidan var han elektroinstallatør i Åmli, med eige firma frå 1972. Han var områdesjef 1985-94 i Heimevernet, med kapteins grad.

Gjennom fire valperiodar, tida 1968-83, var Halvorsen medlem av kommunestyret i Åmli. Den siste fireårsbolken, 1980-83, var han også ordførar i kommunen. Frå 1976 var han i atten år medlem av Aust-Agder fylkesting, til dess han i 1993 vart vald til stortingsrepresentant. Han var då leiar av Nærings- og sysselsettingsstyret i Aust-Agder i seks år, 1985-91.

Hausten 1993 fekk Halvorsen andreplassen på Aust-Agder Arbeidarparti si valliste til Stortinget. Han var då nærast «sikra» stortingsplass, etter to periodar som fyrste vararepresentant. Med attval i 1997 og 2001 hadde han sete i Stortinget til hausten 2005. Dei fyrste fire åra var han medlem i Næringskomiteen, medan han i tida 1997-2005 var medlem i Forsvarskomiteen. Arbeidarpartiet sin fylkessekretær i Aust-Agder omtala han som «en sterk forkjemper for å bevare forsvarsanlegg i landsdelen» til NRK i 2006.

Kjelder

• Stortingsbiografi