Cupvinnarcupfinalen i fotball 1981

Cupvinnarcupfinalen i fotball 1981 fann stad på Olympiakó-stadion i Athen 13. mai 1981, framfor 4 750 tilskodarar. Dinamo Tbilisi frå dåverande Sovjetunionen vann finalen, den 21. i sitt slag, med 2-1 over FC Carl Zeiss Jena frå dåverande Aust-Tyskland.

Kampen

Etter ein mållaus fyrsteomgang gav Gerhard Hoppe det auttyske laget leiinga i det 63. minutt. Fire minuttar seinare syrgde Vladimir Gutsajev for balanse i stillinga. Vitali Daraselia vart matchvinnar for Dinamo Tbilisi med ei skåring i det 86. minutt.

Riccardo Lattanzi frå Italia dømde kampen.

Laga

Dinamo Tbilisi-laget bestod av: Otar Gabelia, Giorgi Tavadze, Nodar Khizanisjvili, Aleksandr Tsjivadze (kaptein), Tamaz Kostava, Zaur Svanadze, Vitali Daraselia, Tengiz Sulakvelidze, Vladimir Gutsajev, David Kipiani og Ramaz Sjengelia. Nuzgar Kakilasjvilij fekk plassen til Svanadze straks før laget utlikna til 1-1.

FC Carl Zeiss Jena mønstra: Hans-Ulrich Grapenthin, Gert Brauer, Rüdiger Schnuphase, Lothar Kurbjuweit (kaptein), Wolfgang Schilling, Gerhard Hoppe, Andreas Krause, Lutz Lindemann, Andreas Bielau, Jürgen Raab og Eberhard Vogel. Etter 75 og 87 minuttars spel måtte fyrst Bielau og så Hoppe vike plass for høvesvis Thomas Töpfer og Ulrich Oevermann.

Kjelder

Denne artikkelen bygger på «File:Dinamo Tbilisi vs Carl Zeiss Jena 1981-05-13.svg» frå Wikipedia på engelsk, den 13. mai 2018.