Dieter Eilts
Dieter Eilts (fødd 13. desember 1964) er ein tysk tidlegare fortballspelar frå Uptgang-Schott, som frå debuten med Werder Bremen i 1985 til han la opp i 2002, oftast opererte frå ei defensiv midtbanerolle i den nordtyske toppklubben. Han vart europameister 1996 med det tyske landslaget og feira i tida 1991-99 triumfar med Werder både i cupvinnarcupen, bundesligaen og den nasjonale fotballcupen.
| Personleg informasjon | |||
|---|---|---|---|
| Fødselsdato | 13. desember 1964 (59 år) | ||
| Fødestad | Upgant-Schott i Vest-Tyskland | ||
| Høgd | 1,86 m | ||
| Posisjon | Forsvarsspelar | ||
| Seniorkarriere* | |||
| År | Lag | Kampar | (Mål) |
| 1984-1988 | SV Werder Bremen II | 132 | (36) |
| 1985-2002 | Werder Bremen | 390 | (7) |
| Totalt | 522 | (43) | |
| Landslag | |||
| 1993-1997 | Tyskland | 31 | (0) |
| * Seniorklubbkampar og mål berre telt for nasjonal liga | |||
Klubbspel endre
Med det sterke Werder-laget vart Eilts i 1991 tysk cupmeister, etter ein finalekamp der han gav Werder leiinga 1-0 før FC Köln utlikna til 1-1- og det måtte straffeskyting til for å avgjere kven som skulle få DFB-pokalen. Werder vann pokalen med fire fulltreffarar mot tre og var dermed klar for neste sesongs cupvinnarcup. Den 6. mai 1992 vann Werder og Eilts 2-0 over AS Monaco i cupvinnarcupfinalen i Lisboa. I den etterfylgjande 1992/93-sesongen gjekk Werder heilt til topps i den tyske seriemeisterskapen, eitt poeng framfor Bayern München. Både våren 1994 og fem år seinare var Eilts med å vinne den tyske cupfinalen i fotball, i 1994 med 3-1 over Rot-Weiss Essen og i 1999 etter straffeskyting mot Bayern München. I finalen mot Bayern utlikna han som lagkaptein og niande ordinære straffeskytar til 4-4, lagkameraten, målvakta Frank Rost syrgde deretter for Werder-siger etter fyrst å ha skåra mot Bayern-målvakt Oliver Kahn og så stoppa Lothar Matthäus sitt påfylgjande forsøk for Bayern.
Eilts spelte 390 seriekampar for Werder og skåra einast sju seriemål.
Landslagsspel endre
Eilts landslagsdebuterte mot USA i Palo Alto i desember 1993 og spelte sin 31. og siste landskamp i Kiev mot Ukraina i juni 1997, utan nokon gong å kome på skåringslista. Han fekk ikkje plass i VM-troppa 1994. Derimot var han i 1996 med på det tyske laget som vann europameisterskapen i England på såkalla «golden goal» mot Tsjekkia.
Merittar endre
- Europameister: 1996 med Tyskland
- Vinnar av cupvinnarcupen: 1992 med Werder Bremen
- Bundesligameister: 1993 med Werder Bremen
- Tysk cupmeister: 1991, 1994 og 1999 med Werder Bremen
Kjelder endre
- Denne artikkelen bygger på «Dieter Eilts» frå Wikipedia på engelsk, den 14. juni 2018.