Fabio Grosso

Fabio Grosso (fødd 28. november 1977) frå Roma er ein italiensk fotballspelar som sidan 2009 har spela for Juventus. Mellom 2003 og 2009 spela han 48 landskampar for Italia, og var sideback på laget som vann VM 2006 i Tyskland.

Fabio Grosso
Statsborgarskap	Italia
Fødd	28. november 1977 (46 år) Roma
Idrett	fotball
Tok del i	VM i fotball 2006, FIFA Confederations Cup 2009, EM i fotball 2008
Utmerkingar	Gullkraven for sportslig fortjenste, offiser av Republikken Italias fortjenstorden

Klubbspel

Grosso spela på nivå 3 i italiensk fotball fram til 2001. Etter å ha vort overført til Perugia debuterte han i Serie A hausten 2001. Januar 2004 signerte han for Palermo og var den sesongen med på å vinne Serie B.

I juni 2006, like før VM i fotball tok til, vart det kjent at Grosso var overført til Inter. Han spela berre ein sesong i Inter, men opplevde å verte italiensk serievinnar. allereie sommaren 2007 skreiv han kontrakt med den franske toppklubben Lyon. I sin fyrste sesong var han med på å sikre klubben både serie- og cupgull. Etter to år i Frankrike drog han sommaren 2009 tilbake til Italia, Juventus vart då hans nye klubb. Han mista plassen i fyrsteellevaren i 2011.

Landslagsspel

Grosso debuterte på det italienske landslaget i 2003. Han er best kjent for å ha skåra 1-0-målet i semifinalekampen mot Tyskland under verdsmeisterskapen i fotball 2006, samt det femte og avgjerande straffesparket i straffetevlinga som avgjorde VM-finalen mellom Italia og Frankrike, etter at sjølve kampen enda 1-1.

Grosso var også med for Italia i EM i fotball 2008. Italia vart då slått ut av turneringa i kvartfinalen etter å tapt straffeskytinga mot den seinare europameisteren; Spania. Han spela sin 48. og siste landskamp hausten 2009, i alt skåra han fire landslagsmål.

Meistertitlar

• VM-gull 2006 for Italia
• Italiensk seriemeister med Inter 2007
• Fransk seriemeister med Olympique Lyon i 2008
• Fransk cupmeister med Olympique Lyon i 2008

Kjelder

• Denne artikkelen bygger på «Fabio Grosso» frå Wikipedia på engelsk, den 18. juni 2012.

Bakgrunnsstoff

Fabio Grosso på FIFA sin offisielle nettstad