Hans Scholl
Hans Scholl (22. september 1918–22. februar 1943) var ein medisinstudent ved Ludwig-Maximilians-Universität i München som høyrte til den kristeleg og humanistisk motiverte antinazistiske gruppa Den kvite rosa. Han blei avretta saman med systera, Sophie Scholl.
| Hans Scholl | |||
 | |||
| Fødd | 22. september 1918 Ingersheim an der Jagst | ||
|---|---|---|---|
| Død | 22. februar 1943 (24 år) | ||
| Statsborgar av | Weimarrepublikken, Det tyske riket | ||
| Yrke | pasifist, motstandskjempar | ||
| Utdanna ved | Ludwig-Maximilians-Universität München | ||
| Mor | Magdalena Scholl | ||
| Far | Robert Scholl | ||
| Medlem | Den kvite rosa | ||
Liv
endre
Hans Scholl var fødd i Ingersheim ved Crailsheim og voks opp i Ulm saman med syskena Inge, Elisabeth, Sophie og Werner. Han var son av den liberale borgarmeistaren Robert Scholl og diakonissesystera Magdalena Scholl. Heimen var protestantisk og kristeleg-humanistisk prega.
I likskap med systera var han i byrjinga ein begeistra tilhengjar av nazismen, og hadde leiande posisjonar innan HJ. På slutten av 1930-talet vendte han seg likevel på grunn av sin kristne tru bort frå nasjonalsosialismen. Både Hans og Sophie Scholl var tiltrekt av katolisismen. Hans Scholl skildrar dette omslaget i eit brev til Carl Muth 22. desember 1941. Møta med teologar som Muth og Theodor Hacker fekk seinare betydning for flygeblada distributert av Den kvite rosa.
Viktig for Hans Scholl si avvising av nasjonalsosialismen var truleg biskop Clemens August von Galen sine preiker, som Schollfamilien fleire gongar fekk i trykt form i postkassa. I preikene sine åtvara mellom anna Galen mot morda på psykisk sjuke.
Etter Abitur følgde riksarbeidsteneste, og han blei så innrullert i hæren. Han begynte så å studere medisin i München. I feriane måtte han gjere teneste ved fronten. Frå juli til november 1942 var han ved austfronten.
Syskena Scholl blei arrestert då dei delte ut sin femte pamflett ved universitetet i München, og blei dømd til døden av Folkedomstolen under leiing av Roland Freisler den 22. februar og avretta med giljotin same dag.