Hans Westfal-Larsen

Hans Peter M. Westfal-Larsen, heitte opphavleg Larsen, namnet endra i 1902; (fødd 30. april 1872 i Bergen, død 7. oktober 1936 i Helsingør) var ein norsk skipsreiar.

Hans Westfal-Larsen
Statsborgarskap	Noreg
Fødd	30. april 1872 Bergen
Død	7. oktober 1936 (64 år) Helsingør
Yrke	reiar

Larsen hadde mellomskule og handelsskule då han i 1889, 18 år gammal, byrja som kontorist i reiarlaget Rasmus F. Olsen. Han vart etter kvart medeigar i ein del av skipa i reiarlaget, og i 1905 lukkast han å skaffe nok kapital til å kontrahere det første skipet sitt. Han slutta då snart hos Olsen og dreiv ein periode som disponent for stadig fleire skip. Verksemda ekspanderte, og like etter at første verdskrigen var over, stifta han aksjeselskapet Westfal-Larsen & Co.

I 1926 starta Westfal-Larsen linjefart på Sør-Amerika, og i 1930 oppretta han Interocean Line, som segla mellom Europa og Stillehavet. På denne tida var reiarlaget det nest største i Noreg; og det største innan tankfart. Då Westfal-Larsen døydde i 1936, disponerte reiarlaget i alt 30 skip.

Westfal-Larsen hadde ei rekkje tillitsverv innan reiarorganisasjonane, både i Bergen og nasjonalt. Han var president i Norges Rederforbund frå 1924 til 1927.

Han vart utnemnd til riddar av St. Olavs Orden i 1928 og var kommandør av Dannebrogordenen.

Westfal-Larsen var grunnleggjar av H. Westfal-Larsen og hustru Anna Westfal-Larsens Almennyttige Fond.

Kjelder

• Denne artikkelen bygger på «Hans Westfal-Larsen» frå Wikipedia på bokmål, den 13. august 2011.