Leiv Stensland
Leiv Stensland (fødd 6. mai 1934) er ein norsk elektrikar og politikar frå Odda i Hordaland. Han representerte Hordaland og Arbeidarpartiet på Stortinget frå 1985 til 1993.
| Leiv Stensland | |
| Statsborgarskap | Noreg |
| Fødd | 6. mai 1934 |
| Død | |
| Yrke | politikar, elektriker |
| Språk | norsk |
| Politisk parti | Arbeidarpartiet |
Stensland var son til ein industriarbeidar. Sjølv gjekk han på lærlingeskule og yrkesskule i Odda frå 1949 til -52. Etter eit år på elektrikarlinja, byrja han i lære. Han arbeidde så som elektrikar hos L.L. Reisæter i Odda frå 1953, tok fagbrev i 1958. I 1978 fekk han jobb som oppsynsmann i Odda kommune.
Stensland var medlem i Odda kommunestyre samanhengande frå 1960 til 1985. Han hadde plass i formannskapet 1968-75 og var ordførar 1980-85. Elles hadde Stensland ei rad med leiarposisjonar i Odda. Mellom anna var han formann 1964-80 i eldreomsorgsutvalet og 1972-79 i sosialstyret. Han var òg styreformann 1976-80 for sjukeheimen i Odda, og 1976-80 for Fylkessjukehuset i Odda, samt 1977-80 for Stord sjukepleieskule.
Hausten 1985 vart Stensland vald til stortingsrepresentant frå Hordaland og for Arbeidarpartiet. Dei neste fire åra var han medlem i Sosialkomiteen. Etter attval i 1989 flytta han over i Forsvarskomiteen, der han var medlem til han forlet Stortinget i 1993. Samstundes med han sat på Stortinget, var han styreleiar 1989-93 i Norske industrikommuners sammenslutning og frå 1987 styreformann i Folgefonntunnelen A/S, ein posisjon han hadde i 14 år. 1996-2000 var han styreformann i Odda Energi A/S.