Morten Vinje
Morten Vinje (fødd 5. juli 1956) er ein tidlegare fotballspelar frå Langesund som vart noregsmeister med Moss Fotballklubb i 1983 og som spelte 15 landskampar i 1979-80.
| Morten Vinje | |
| Statsborgarskap | Noreg |
| Fødd | 5. juli 1956 (68 år) |
| Idrett | fotball |
Vinje spelte i yngre år på Larvik Turn. Etter at oslolaget Skeid rykte opp frå 2. divisjon i 1977-sesongen, og Larvik Turn samstundes rykte ned frå same divisjon og avdeling, melde han seg inn i Skeid, der han på midtstopparplass spelte 132 kampar. Då Skeid måtte tole nedrykk i 1980, reiste Vinje vidare til Moss FK. Med Moss spelte han NM-finale både i 1981 og 1983, i fyrste forsøk vart det tap mot Lillestrøm SK, to år seinare vart det siger mot Vålerenga.
I 1979-sesongen deltok Vinje i 11 landskampar for Noreg. Den ellevte siste kampen for året enda med siger over Vest-Tyskland sitt amatørlag i Baunatal, ein triumf som gjorde at Noreg var kvalifisert til Sommar-OL 1980. Etter som Norges Idrettsforbund valde å boikotte Moskva-leikane, måtte dei norske landslagsspelarane halde seg heime. Vinje fekk i staden fire kampar i den norske landslagsdrakta i 1980, i hans siste landskamp var han med å vinne 2-1 over Sveits i ein VM-kvalifiseringskamp på bortebane. Han kom aldri på skåringslista på landslaget, og sjeldan i klubbkampar.
Merittar
endre- Noregsmeister: 1983 med Moss FK
- Tapande cupfinalist: 1981 md Moss FK