Nikolaj Morilov

Nikolaj Sergejevitsj Morilov (fødd 11. august 1986) er ein russisk langrennar frå Perm. Han vann to VM-medaljar og ein OL-medalje i perioden 2007-10. I 2007 fekk han sølv i parstafetten under verdsmeisterskapen, to år seinare tok han bronsen i sprintøvinga ved Ski-VM 2009. Til sist vann han i 2010 ein OL-bronse i parstafett.

Nikolaj Morilov
Statsborgarskap	Russland
Fødd	11. august 1986 (37 år) Perm
Idrett	langrenn
Tok del i	Langrenn under Vinter-OL 2010 – Lagsprint menn, Ski-VM 2007, Ski-VM 2009, Ski-VM 2011
Utmerkingar	Fedrelandets fortjenstordens medalje av 2. klasse

Aktiv

Morilov deltok i verdscupen i langrenn frå desember 2004 til vinteren 2017. Han spesialiserte seg i sprint og vann tre tevlingar i sprintøvinga, to av desse i etapperenn i Tour de ski. Hans einaste verdscuptriumf elles kom då han vann sprinttevlinga i Rybinsk 22. januar 2010. Omframt desse enkeltrenna, var Morilov med om å vinne fire parstafettar i verdscupen i tida frå desember 2009 til januar 2013.

Under verdsmeisterskapen 2007 i Sapporo stilte Russland med Vasilij V. Rotsjev og ankermann Morilov på parstafetten. På oppløpet kjempa Morilov og Italias Cristian Zorzi om sigeren. Dei to utøvarane fekk same sluttid, målfoto viste at gullet gjekk til Italia og sølvet til Russland. To år seinare spurta Morilov over målstreken til bronsemedalje i sprinttevlinga ved Ski-VM 2009 i Liberec, einast nordmennene Ola Vigen Hattestad og Johan Kjølstad var kjappare. Under dei olympiske vinterleikane 2010 i Vancouver vart det ein ny bronsemedalje på Morilov, etter at parkamerat Aleksej Petukhov måtte gje tapt mot Tysklands ankermann Axel Teichmann i kampen om sølvplassen.

Kjelder

• Denne artikkelen bygger på «Nikolai Sergejewitsch Morilow» frå Wikipedia på tysk, den 17. mars 2019.