Romsonden Schiaparelli
Schiaparelli var ein marssonde frå Den europeiske romfartsorganisasjonen (ESA) og ein del av ExoMars-programmet. Han vart skild frå banesonden ExoMars Trace Gas Orbiter (TGO) nær Mars 16. oktober 2016, og styrta ukontrollert inn i marsyta tre dagar seinare.[1][2]
Ei undersøking av den mislukka landinga kom fram til at motstridande informasjon i datamaskina til landaren valda styrten. Landingsprosedyrane enda for tidleg, mellom anna fyrte landingsrakettane av for berre 3 sekund i staden for 30 sekund. Ein del data vart sendt attende under landinga som planlagt, mellom anna frå sensorar på rygg- og varmeskjolda.[2]
Schiaparelli var meint som ei utrøyning av teknologi nytta for å gå inn i atmosfæren til Mars, dala ned gjennom denne atmosfæren og å landa på marsyta. Landaren bar òg med seg vitskaplege instrument.[3]