Annik Saxegaard

Anna Constance Saxegaard, kjend som Annik Saxegaard, (21. mai 1905–16. august 1990) var ein norsk forfattar. Ho skreiv i fyrste rekkje barne- og ungjentebøker. Bøkene hennar er kjende også utanfor Noreg, særleg i Tyskland, men dei har ofte kome ut under eit av dei fleire pseudonyma ho nytta, til dømes Berte Bratt, Nina Nord eller Ulla Scherenhof.

Annik Saxegaard
Statsborgarskap	Noreg
Fødd	21. mai 1905 Stavanger kommune
Død	16. august 1990 (85 år) Kiel
Yrke	journalist, skribent

Oppvekst og utdanning

Ho var fødd i Stavanger. Familien flytte seinare til Oslo og ho tok artium før ho ei kort tid prøvde seg som skodespelar. Ho var mellom anna med i stumfilmen Brudeferden i Hardanger i 1926, men så vende ho scena og filmen ryggen. Ho arbeidde som journalist, tekstforfattar og som programmedarbeidar i Bergen kringkaster, og etterkvart byrja ho å skrive skjønnlitteratur.

Forfattarskap

Den fyrste utgjevinga frå hennar hand kom i 1933 og var ei samling dramatikk for amatørteater; Fem sketcher for unge piker. Året etter kom Katten Busters opplevelserden, den fyrste av ei rekkje bøker med dyreforteljingar for born. I 1935 kom vaksenromanen To værelser og kjøkken. Sjølv om Saxegaard hadde skrive boka for vaksne vart ho oppfatta som ei ungjentebok, og den liberale haldninga til kjærleik og seksualitet samtida meinte å finne i boka, gjekk ikkje like godt heim hjå alle. Boka fekk likevel merksemd og alt same året kom ho ut i svensk omsetjing. Året etter kom ho òg ut på dansk.

I tiåra som kom fekk ho utgjeve ei, eller helst fleire, nyskrivne bøker kvart år, og mange vart omsette og utgjevne i andre land. I 1958 flytta ho til Kiel i Tyskland, og etterkvart byrja ho skrive bøkene sine på tysk, og ein del av desse har aldri kome ut på norsk. Annik Saxegaard døydde i Kiel 16. august 1990.

Bøker

Lista er ikkje uttømande.

Dramatikk

• 1933 – Fem sketcher for unge piker
• 1936 – Nattkalas i pensjonatskolen : skuespill i 1 akt

Dyreforteljingar for born

• 1934 – Katten Busters opplevelser
• 1935 – Hunden Boy forteller
• 1936 – Folen Borkas bedrifter
• 1937 – Boy og Buster
• 1938 – Hvalpen Billy og kattemor
• 1939 – Billy Rampus og katten Bajas
• 1941 – Katten Balkis på egen labb
• 1944 – Burre Bums og Veslemor
• 1950 – Vesle blå Bonnie
• 1951 – Ni små Bonnie-hvalper
• 1952 – Apekatten Bussi
• 1953 – En uke i hundehagen
• 1954 – Svartepus, Kvitepus og Bingo
• 1956 – Hønemor og de andre

Kjelder

• «Berte Bratt», henta frå Wikipedia på tysk 19. juli 2006, som oppgjev denne kjelda:
  • Malte Dahrendorf: Berte Bratt. In Klaus Doderer (Hrsg.): Lexikon der Kinder- und Jugendliteratur. Beltz Verlag, Weinheim und Basel, Band 1, 1984.
• Bibliotekkatalogen til Norsk Barnebokinstitutt Arkivert 2006-07-19 ved Wayback Machine.
• Bibsyskatalogen Arkivert 2017-12-03 ved Wayback Machine.
• Redaktør: A. Heltberg – Norsk film gjennom 35 år. Nasjonalforlaget, Oslo 1943.