Atje Keulen-Deelstra

Atje Keulen-Deelstra (31. desember 1938–22. februar 2013) var ein nederlandsk skeiseløpar frå Grouw i Friesland. som vart verdsmeister i firkamp fire gongar i tida 1970-74 og europameister tre år på rad, 1972-74 .

Atje Keulen-Deelstra
Statsborgarskap	Kongeriket Nederlanda
Fødd	31. desember 1938 Grove
Død	22. februar 2013 (74 år) Leeuwarden
Idrett	lengdeløp på skeiser
Tok del i	Hurtigløp på skøyter under Vinter-OL 1972 – 1000 meter damer, Hurtigløp på skøyter under Vinter-OL 1972 – 1500 meter damer, Hurtigløp på skøyter under Vinter-OL 1972 – 3000 meter damer

Keulen-Deelstra slo gjennom i 1970-sesongen, 31 år gammal. Etter å ha vorte nederlandsk meister vann ho firkamp-VM i West Allis framom landskvinna Stien Kaiser, og det utan å ha vore betre enn nummer tre i nokon av enkeltdistansane. I den fyrste sprintverdsmeisterskapen enda ho på tredjeplass. Den 14. mars runda ho av 1970-sesongen med å setje verdsrekord på 1500 meter med tida 2.17,2. Under den fyrste europameisterskapen for kvinner, avvikla i Leningrad i 1971, måtte ho sjå seg slått av tre sovjetiske utøvarar og vart nummer fire. Både i firkamp-VM og sprint-VM 1971 hamna ho langt nede på resultatlistene.

OL-sesongen 1972 gjekk Keulen-Deelstra inn til laurbærkrans i både den nasjonale meisterskapen, i EM og i VM, dei to sistnemnde meisterskapane etter tett strid mot høvesvis Nina Statkevitsj og Stien Kaiser. Under dei olympiske vinterleikane 1972 i Sapporo kneip ho sølvmedaljen på 1000 meter, eitt hundredels sekund framom Anne Henning, og tok bronsemedaljane på 1500 m og 3000 m. År 1973 var Keulen-Deelstra verdas klart beste skeiseløpar på kvinnesida. Ho vann europameisterskapen på Brandbu med over tre tidspoeng til andreplasserte Trinjie Rep, og VM 1973 i svenske Strömsund med langt over to tidspoeng til Tatjana Rastopsjina frå Sovjetunionen. I sprint-VM 1973 i Oslo tok Keulen-Deelstra andreplassen, der Sheila Young frå USA var i ei eiga klasse. Gjennom 1974-sesongen kopierte ho plasseringane frå året føreåt. Ho vart både europameister og verdsmeister i firkamp, med god avstand til sovjetiske Nina Statkevitsj. I sprint-VM 1974 vann ho sølvpokalen, Leah Poulos frå USA sikra seg VM-tittelen.

Sidan deltok ikkje Keulen-Deelstra internasjonalt.

Kjelder

• Denne artikkelen bygger på «Atje Keulen-Deelstra» frå Wikipedia på engelsk, den 19. januar 2018.