Diego Rivera

Diego María de la Concepcíon Juan Nepomuceno Estanislao de la Rivera y Barrientos Acosta y Rodríguez (8. desember 1886–24. november 1957) var ein meksikansk målar frå byen Guanajuato. Han er særleg kjend for å ha måla ei rad store og monumentale bilete i offentlege bygningar, både i og utanfor Mexico. Rivera var gift med, mellom andre, målaren Frida Kahlo.

Diego Rivera
Statsborgarskap	Mexico
Fødd	8. desember 1886 Delstaten Guanajuato, Guanajuato, Byen Guanajuato
Død	24. november 1957 (70 år) Mexico by, Coyoacán
Yrke	muralist, bygningstegner, teiknar, kunstmålar, grafikar, bilethoggar
Språk	spansk
Medlem av	Colegio Nacional, Academia Nacional de Bellas Artes de Argentina
Religion	ateist
Ektefelle	Angelina Beloff, Guadalupe Marín, Frida Kahlo, Frida Kahlo, Emma Hurtado
Diego Rivera på Commons

Fresko over Mexicos historie i nasjonalpalasset i Mexico-byen

Liv og gjerning

Rivera reiste i unge år til Paris for å få innblikk i nye kunstretningar. Han busette seg i bydelen Montparnasse, der venen Amedeo Modigliani portretterte han i 1914. I Paris vart han særleg inspirert av kubismen.

Tidleg på 1920-talet vende Rivera tilbake til Mexico. Allereie i 1921 gjekk han i gang med å måle freskoar i offentlege bygningar. I bileta sine synte han fram det meksikanske folkelivet og den stadeigne historia. Særleg merksemd retta han mot folkeoppstandane, dei meksikanske tema sette han oftast inn i ein kritisk, politisk samanheng. Stilen hans henta impulsar frå realisme og førkolumbiansk-mesoamerikansk kunst og kombinerte desse på ein original måte.

Politisk engasjerte Rivera seg i den kommunistiske rørsla. Han reiste til Moskva, men der vart han utvist grunna sin anti-sovjetiske ståstad i mange spørsmål. I 1929 vende han tilbake til Mexico og gifta seg med den 22-år gamle Frida Kahlo.

Frå 1930 til -33 laga Rivera ei rad freskoar i USA. Desse skildra i fyrste rekke livet i den industrielle verda. I 1933 opplevde han at freskoen Man at the Crossroads (Mennesket ved skiljevegen) i Rockefeller Center i New York City vart teke ned. Biletet vart fjerna etter oppstyr over at Vladimir Lenin var portrettert i freskoen. Den negative omtalen førte til at han ikkje fekk måle ein bestilt fresko til Verdsutstillinga i Chicago. Harm og audmjuka vende han i desember 1933 tilbake til Mexico.

Nokre få år etter at kona, Frida Kahlo, tok livet sitt i 1954, fekk Rivera påvist ei sjeldan form for kreft og døydde 24. november 1957. Han er gravlagd i Panteon de Dólores i Mexico-byen.

Kjelder

• Denne artikkelen bygger på «Diego Rivera» frå Wikipedia på dansk, den 18. juli 2013.