Halvor Bunkholt
Halvor Bunkholt (17. juni 1903–9. mai 1978) var ein norsk lensmann, gardbrukar og politikar frå Sauherad som representerte Bondepartiet/Senterpartiet på Stortinget i to periodar på 1950-60-talet.
| Halvor Bunkholt | |
| Statsborgarskap | Noreg |
| Fødd | 17. juni 1903 |
| Død | |
| Yrke | politikar |
| Språk | norsk |
| Politisk parti | Senterpartiet, Venstre |
Far til Bunkholt var lensmann. Sjølv gjekk han framhaldsskule, folkehøgskulen Sagavoll 1920/21 og Otto Treiders Handelsskole i Oslo i 1923. Deretter utdanna han seg til politi ved Statens politiskule gjennom eit 4 og ein halv månad langt kurs.
18 år gammal vart han lensmannsbetjent under far sin. Då faren døydde i 1931 tok Bunkholt over stillinga som lensmann i Sauherad, ei stilling han hadde til 1972, bortsett frå nokre år under 2. verdskrigen, då okkupasjonsmakta avsette han. I tillegg dreiv han garden Søndre Vegheim med mjølkekyr og fruktavl.
Bunkholt var han medlem i kommunestyret i Sauherad frå 1934 til 1971, dei to siste åra som varaordførar. Opphavleg representerte han Venstre, men bytta tidleg over til Bondepartiet då han var usamd med Venstre i landbrukspolitikken. Frå 1945 til 1957 var han formann i Telemark Bondeparti. Han var stortingsrepresentant frå Telemark i to periodar; frå 1950 til -53 for Bondepartiet, og frå 1958 til -61 for Senterpartiet. Ved begge desse vala stilte Bondepartiet/Senterpartiet fellesliste med Høgre. Til stortingsvalet i 1953 stilte Senterpartiet liste åleine, utan å få vald ein representant frå Telemark. Alle åtte stortingssesjonane var Bunkholt medlem i Justiskomiteen. Han interesserte seg likevel meir for samferdsle- og landbrukspolitikk. Særleg engasjerte han seg i vegbygging.
Bunkholt var styreformann i Akkerhaugen forbruksforening og i Saude og Nes sparebank. Han hadde elles styreverv i Bøndenes Bank i Skien, Notodden Bank, Skien-Telemarken Dampskipselskap, Sauherad kraftverk og Midt-Telemark kraftlag.