Johan Bollmann
Johan Henrik Bollmann (1. september 1868–22. oktober 1945) var ein norsk skipsreiar, skipsmeklar og politikar frå Bergen, stortingsmann for Frisinna Venstre.
Bollmann kom frå ei rik kjøpmannslekt. Etter å ha teke artium som privatist underviste han 1888-1900 ved Bergens tekniske aftenskole, samstundes var han frå 1885 volontør i skipsreiar- og meklarfirmaet Ths. Svanøe. I 1900 tok han over firmaet og dreiv det i eige namn fram 1925.
Bollmann hadde ei lang rekke styreverv i forretningslivet, det vere seg forsikringsselskap og industriverksemder. Mellom anna var han formann i to år i Bergens Skibsmæglerforening og formann i forstandarskapet til Bergens Sparebank.
Politisk engasjerte Bollmann seg for Frisinna Venstre. Han var såleis bystyremedlem 1898–1901 og 1913–16 i Bergen, hovudstyremedlem i Frisinna Venstre. Perioden 1922–1924 var han varamann til Stortinget og møtte fleire gongar i 1923 og 1924 i staden for Johan E. Mowinckel. Tingbolken 1928–30 hadde han fast plass på Stortinget, då nestformann i Post- og telegrafkomiteen.