Johan Jongkind

Johan Barthold Jongkind (3. juni 1819–9. februar 1891) var ein nederlandsk målar og grafikar. Han måla kystlandskap på ein eigen og sjølvstendig måte. Stilmessig vert han rekna som ein forløpar til impresjonismen.

Johan Jongkind
Pseudonym	Jongkind‏, Johan Barthold, Jongkind, Jean Berthold
Statsborgarskap	Kongeriket Nederlanda
Fødd	3. juni 1819 Lattrop
Død	9. februar 1891 (71 år) La Côte-Saint-André
Yrke	kunstmålar, grafikar, teiknar, biletkunstnar, grafikar
Språk	nederlandsk
Sjanger	landskapsmåleri
Johan Jongkind på Commons

Liv og gjerning

Jongkind kom til verda i landsbyen Lattrop i Overijssel-provinsen i Nederland, nær grensa mot Tyskland. Han gjekk i lære på kunstakademiet i Haag, før han i 1846 flytta til bydelen Montmartre i Paris. Der studerte han vidare under målarane Eugène Isabey og Francois-Edouard Picot. To år seinare fekk han stilt ut verk på salongen i Paris, og hausta anerkjenning frå kritikaren Charles Baudelaire og seinare frå Emile Zola. Men han fekk smått med suksess, og leid tidvis av depresjonar som gjerne vart forsterka av stort forbruk med alkohol.

I 1855 busette Jongkind seg i Rotterdam, og heldt seg der dei neste fem åra. Han flytta så tilbake til Paris i 1861 og skaffa seg atelier i bydelen Montparnasse. Nokre av bileta hans byrja så smått å vise glimt av den impresjonistiske stilen han skulle kome til å utvikle. I 1862 møtte han i Normandie kunstnarvener som Alfred Sisley, Eugène Boudin og den unge Claude Monet, som alle tre såg på Jongkind som ein mentor. Året etter stilte Jongkind ut bilete på den aller fyrste utstillinga med måleri som var avvist på Pariser-salongen.

Jongkind flytta i 1878 til småbyen Côte-Saint-André i nærleiken av Grenoble. Der døydde han 13 år seinare og vart gravlagd på den lokale kyrkjegarden.

Riving i Rue des Franc-Bourgeois St. Marcel, 1868

Overschije i månelys, 1871

Stil og motiv

Jongkinds vanlegaste motiv var kystlandskapet, som han måla både i Nederland og i Frankrike. Mange av verka hans skildrar elva Seinen, særleg området nær Notre-Dame-katedralen. Han måla med vassfargar i friluft, for så å bruke desse bileta som skisser til oljemåleria han laga i ateliereret. Måleria hans er karakterisert av kraftig penselføring og sterke kontrastar. Til liks med 1600-talets nederlandske landskapsmålarar komponerte han landskapa sine med ein låg horisont og let himmelen dominere i biletet.

Kjelder

• Denne artikkelen bygger på «Johan Jongkind» frå Wikipedia på engelsk, den 4. juli 2013.