Judith Butler

Judith Butler (fødd 24. februar 1956) er ein amerikansk filosof og litteraturvitar. Hen er professor i retorikk og samanliknande litteratur ved University of California i Berkeley.

Judith Butler
Fødd	24. februar 1956 Cleveland
Nasjonalitet	USA
Område	feministisk teori, skeiv teori, litteraturteori, kjønnsforskning, Kjønnsinkongruens, sosiologi, psykologi, psykoanalyse, filosofi, feminisme, politisk filosofi, etikk
Yrke	filosof, skribent, universitetslærar, sosiolog, litteraturkritikar, kvinnesaksforkjemper, journalist, kunstteoretiker, queer theorist, samfunnsvitar, psykolog, psykoanalytiker
Institusjonar	Wesleyan University University of California, Berkeley European Graduate School
Alma mater	Bennington College Yale University Universitetet i Heidelberg
Doktorgradsrettleiar	Maurice Natanson
Sambuar	Wendy Brown
Medlem	American Academy of Arts and Sciences British Academy

Judith Butler ved Universitetet i Hamburg

Butler er mest kjend for bøkene Gender Trouble: Feminism and the Subversion of Identity og Bodies That Matter: On The Discursive Limits of «Sex», som utfordrar førestillingar om kjønn og utviklar teorien hens om kjønnsperformativitet. Denne teorien speler i dag ei stor rolle i kjønnsforsking.

Butler har òg markert seg i kampen for LHBT-menneske sine rettar, og deltatt i ei rekke aktuelle politiske diskusjonar. Mellom anna er hen ein krass kritikar av israelsk politikk.

Liv og arbeid

Butler er fødd i Cleveland i Ohio, av foreldre med russisk og ungarsk jødisk opphav. Størstedelen av familien til mormora omkom i Holocaust. Interessa for filosofi kom med studier i jødisk etikk frå 14-årsalderen.

Butler studerte filosofi ved Yale University, og fullførte PhD-graden i 1984. I essayet Performative Acts and Gender Constitution frå 1988 begynte hen å utvikle kjønnsteorien som blei viktig i hovudverket Gender Trouble: Feminism and the Subversion of Identity frå 1990. Her argumenterer Butler mellom anna for at både det sosiale og det biologiske kjønnet er sosiale konstruksjonar. Me handlar ikkje på bestemte måtar fordi me føler oss som kvinner eller menn, men føler oss som kvinner eller menn fordi me handlar på bestemte måtar. Gender Trouble og Bodies That Matter frå 1993 gjorde Butler til eksponent for skeiv teori. I The Psychic Life of Power: Theories in Subjection (1997) analyserer hen undertrykkingas mekanismar, mens hen i Excitable Speech: A Politics of the Performative (1997) mellom anna behandlar spørsmål rundt hatprat og sensur.

Butler bur i dag i Berkeley i California, saman med professor i statsvitskap Wendy Brown, og sonen deira Isaac.

Utvald verkliste

• "Subjects of Desire: Hegelian Reflections in Twentieth-Century France", 1987

• "Gender Trouble: Feminism and the Subversion of Identity", 1990

• "Bodies That Matter: On the Discursive Limits of "Sex"", 1993

• "Excitable Speech: A Politics of the Performative", 1997

• "The Psychic Life of Power: Theories in Subjection", 1997

• "Antigone's Claim: Kinship Between Life and Death", 2000

• "Prejudicial Appearances: The Logic of American Antidiscrimination Law", 2002

• "Precarious Life: The Powers of Mourning and Violence", 2004

• "Undoing Gender", 2004

• "Giving An Account of Oneself", 2005

• "Is Critique Secular?: Blasphemy, Injury, and Free Speech", 2009

• "Frames of War: When Is Life Grievable?", 2009

• "The Power of Religion in the Public Sphere", 2011

• "The Question of Gender : Joan W. Scott's critical feminism", 2011

• "Parting Ways: Jewishness and the Critique of Zionism", 2012