Knut Samset

Knut Iversen Samset (fødd 1879 i Måndalen i Romsdal, truleg drepen 1936 i Hubei-provinsen i Kina) var ein norsk misjonær for Det norsk-lutherske Kinamissionsforbund rundt Laohekou i Kina.

Knut Samset
Statsborgarskap	Noreg
Fødd	5. april 1879 Voll kommune
Død	1936 (57 år)
Yrke	misjonær

Samset var utdanna ved misjonsskolen til Misjonsambandet og vart etter eit opphald i England misjonær i Kina i 1902. I 1904 tok han til med arbeidet i Neixiang, men fann snart at dette var upraktisk. Derfor opna han i staden i 1907 misjonsstasjonen Lushan som fekk ei kyrkje med 400 sitjeplassar, guteskole i 1910 (og etter Samsets død ei ny kyrkje i 1938 med 1500 sitteplassar).

Samset var tilsynsmann for misjonen frå 1919 til 1935, og utførte mykje arbeid med den kinesiske songboka til misjonen. Han vart tatt til fange av ein røvarbande i 1936 og døydde etter nokre månader. Ingen veit nøyaktig når eller på kva måte han døydde, og grava hans vart ikkje funnen.