Musée d'Orsay

Musée d'Orsay (fransk uttale [myze dɔʁsɛ]) er eit museum i Paris. Museet held til i ein nedlagt jarnbanestasjon, Gare d'Orsay, bygd mellom 1898 og 1900. Samlingane består i hovudsak av fransk kunst frå tida mellom 1848 og 1914, og omfattar måleri, skulpturar, møblar og fotografi. Museet er særleg kjent for samlinga av impresjonistisk og postimpresjonistisk kunst. Kunstnarar som Monet, Manet, Degas, Renoir, Cezanne, Seurat, Gauguin og Van Gogh er rikeleg representert i utstillingane.

Museet har ei utstillingsflate på 57 400 m² og hadde 3,2 miliionar besøkande i 2007.

Historie

Bygninga vart reist som jarnbanestasjon til Verdsutstillinga i 1900, og tente som stasjon for dei sørvestre linjene i Paris til 1939. Den opphavlege jarnbanestasjonen vart teikna av Victor Laloux. Ombygginga til museum vart vedteken i 1977 og gjennomført i perioden 1983-86 med etter teikningar frå arkitektane Renaud Bardon, Pierre Colboc, Jean-Paul Philippon og den italienske interiørarkitekten Gae Aulenti.

Utstillingar

Grunnplanet er vigd verk frå før 1870, med to rekker av skulpturar langs midten og måleri langs sidene. Utstillinga held fram kronologisk i toppetasjen med meisterverk frå impresjonismen. Dei nyaste verka finst i mellometasjen. Her er det også salar med møblar og gjenstandar i art nouveau.

Bakgrunnsstoff

Wikimedia Commons har multimedia som gjeld: Musée d'Orsay

Offisiell nettstad