Olaf Knudson

Olaf Knudson (31. desember 1915–8. januar 1996) var ein norsk gardbrukar og politikar frå Sigdal i Buskerud. Han representerte Buskerud fylke og partiet Høgre på Stortinget i 24 år.

Olaf Knudson
Statsborgarskap	Noreg
Fødd	31. desember 1915 Sigdal kommune
Død	8. januar 1996 (80 år)
Yrke	politikar, bonde
Språk	norsk
Politisk parti	Høgre

Knudson var son til ein gardbrukar. Han gjekk 1933-35 skogskulen på Storhove Landbruksskule i Oppland. Dei neste åra arbeidde han heime på garden. I 1939 vart han student ved skogbruksavdelinga på Noregs landbrukshøgskole og i 1942 tok han eksamen som forstkandidat . Han tok over farsgarden i 1942 og dreiv denne og frå 1946 også eit eige sagbruk fram til 1976.

Knudson var medlem av heradsstyret i Sigdal frå 1945 til -67. Han var varaordførar i åra 1947–55. Ved stortingsvalet hausten 1953 vart han vald inn på Stortinget frå Buskerud, og vart attvald heile fem gongar. I sesjonane frå 1954 til 1967 var han med i Skog-, vassdrags- og industrikomitéen, nestformann 1958–65. Knudson var representanten som i 1963 fremja framlegget om mistillit til Einar Gerhardsen si regjering, og som førte til at regjeringa måtte gå av. Frå 1967 til 1975 var Knudson med i Industrikomiteen, som nestformann dei to siste sesjonane. Han avslutta tida som stortingsrepresentant med plass 1975-77 i Administrasjonskomitéen. Knudson var medlem i landsstyret til Høgre frå 1955 til 1970.

Frå 1978 til -83 var Knudson formann i Det norske Skogselskap.

Kjelder

• Stortingsbiografi