Ulrik Lange

Ulrik Frederik Lange (28. juli 1808–8. september 1878) var ein skulemann og stortingsmann, fødd på Jevnaker i Oppland. Otto Lange var bror hans.

Ulrik Lange
Statsborgarskap	Noreg
Fødd	28. juli 1808
Død	8. september 1878 (70 år)
Yrke	politikar
Språk	norsk
Medlem av	Det Kongelige Norske Videnskabers Selskab, Det Norske Videnskaps-Akademi
Ulrik Lange på Commons

Ulrik Lange vart student frå Christiania katedralskole i 1826 og cand. theol. i 1832. Under studietida var han lærar ved latinskulane i Drammen og seinare i Christiania. Frå 1832 var han styrar av Tromsø middelskole, til han 1849 fekk ei liknande stilling på Lillehammer. Der arbeidde han til han døydde.

Lange var bystyremedlem i mange år, både i Tromsø og på Lillehammer.

Lange representerte Tromsø på Stortinget i 1842 og 1845, og krinsen Lillehammer og Hamar 1854-60. Han var medlem 1842 av gasje- og pensjonskomiteen, 1845 av kyrkjekomite nr 2, 1854 av kyrkjekomiteen og komiteen om fordelinga av vegskatten. 1857 var han formann i kyrkjekomiteen og medlem av komiteen om representasjonsfordelinga, 1859-60 atter medlem av kyrkjekomiteen. Både i 1857, på omframstortinget 1858 og det ordinære stortinget 1859-60 var Lange medlem av Lagtinget.

Han døydde på Lillehammer i 1878, ein månad før han skulle gå av frå rektorstillinga.

Kjelder

• Lindstøl, Tallak: Stortinget og Statsraadet 1814-1914. Kristiania, 1914
• Biografisk informasjon om Ulrik Lange NSD Norsk senter for forskningsdatas politikararkiv