Veggli stavkyrkje
60°2′35″N 9°8′46″E / 60.04306°N 9.14611°E
.jpg)
Veggli stavkyrkje var ei stavkyrkje i Veggli i Rollag kommune i Numedal.
Alderen til kyrkja synest ikkje å vere kjend. Kunnskapen om kyrkja byggjer for ein stor del på oppmålingar og skisser utarbeidde av Christian Christie før kyrkja vart riven i 1861, to år etter at dagens Veggli kyrkje stod klar.
Det opphavelege stavbygget skal ha hatt rektangulært skip og smalare kor, der skipet var om lag 5,70 m langt og 4,60 m breitt og veggane var om lag 3,75 m høge. Breidda på koret anslås til rundt 2 meter. Dette koret vart truleg rive i 1684, då kyrkja fekk eit nytt, tømra kor. Kyrkja var blitt utvida nokre år tidlegare og vart utvida igjen i 1704–08 med tverrskip, slik at ho vart ei krosskyrkje. Etter midten av 1700-talet fekk kyrkja våpenhus.[1]
Det finst få vitnesbyrd om interiøret, men ein korbogestav er å finne i Oldsaksamlinga, og det skal finnast ei rosemåla dør og nokre dekorerte bord frå kyrkja i privat eige.
Døypefonten frå stavkyrkja er overført til den nye kyrkja. Elles synest det gamle inventaret å ha gått tapt.
Kyrkjegarden vart utvida i 1828 og var i bruk også etter at kyrkjegarden ved dagens kyrkje var opparbeidd. Han er omgjeven av eit steingjerde med portal ved inngangen. Innanfor finn ein berre ville vekstar, inga synleg tuft.
Fotnotar
endre- ↑ Bygningshistoria byggjer på «Norges kirker».
Kjelder
endre- Sigrid og Håkon Christie: Veggli kirke i «Norges kirker»
- Denne artikkelen bygger på «Veggli stavkirke» frå Wikipedia på bokmål, den 28. mai 2019.
Bakgrunnsstoff
endre- Jan Brendalsmo: Middelalderske kirkesteder i Buskerud fylke (Riksantikvaren, 2015), s. 59
- Veggli stavkyrkje i kulturminnesok.no, nettstaden til Riksantikvaren