Alexander Keith's Brewery

Alexander Keith's er eit kanadisk bryggeri grunnlagd i 1820 i Halifax i Nova Scotia noko som gjer det til eit av dei eldste kommersielle bryggeria i heile Nord-Amerika. Det vart grunnlagd av Alexander Keith som emigrerte frå Skottland i 1817. I dag er bryggeriet kontrollert av Labatt, ei undergruppe av Anheuser–Busch InBev, tidlegare Interbrew. Bryggeriet produserer òg Oland Brewery sitt øl som er distribuert i det austlege Canada.

I april 2011 tok Alexander Keith's til å selje øl i USA etter det hadde berre vore seld i Canada i nær 200 år.

Keith's bryggeri produserer Keith's India Pale Ale, Keith's Red Amber Ale, Keith's Premium White, Keith's Light Ale og Keith's Dark Ale, tidlegare kjent som Stag's Head Stout på den kanadiske marknaden, og Keith's Nova Scotia Style Pale Ale, Keith's Nova Scotia Style Lager og Keith's Nova Scotia Style Brown Ale for marknaden i USA. Keith's første, mest populære og mest utbreidde øl er India Pale Ale. Keith's har òg produsert Keith's Ambrosia Blonde, Keith's Harvest Ale og Keith's Tartan Ale som sesongbrygg. Opphavleg vart ølet brygga i bryggeriet i Halifax. I dag har Keith's utvida produksjonen til andre bryggeri, og er no produsert i Ontario (London), Quebec (Montreal), Newfoundland (St. John's), British Columbia (Creston), og Missouri (St. Louis), i tillegg til det opphavlege Halifax-bryggeriet som no produserer øl for alle dei kanadiske kystprovinsane.

Referansar

• Denne artikkelen bygger på «Alexander Keith's Brewery» frå Wikipedia på engelsk, den 3. desember 2012.