Amanda Igland

Amanda Grotle Igland (1917–2002) var ei norsk pensjonatvertinne, fiskarkone, lokalpolitikar og organisajonskvinne frå Bremanger.

Amanda Igland
Fødd	1917
Død	2002 (85 år)

Organisasjonslivet

Amanda Igland var svært engasjert i fiskarkvinnene sine kår. I 1953 var Igland med å skipe Norges Fiskarkvinnelag der ho også var leiar i 11 år. Ho var også med å skipe organisasjonen Sogn og Fjordane Fiskarkvinnelag og sat som leiar der i 12 år.

Amanda Igland var hovudpersonen bak vedtaket om at fiskarkvinnene skulle representerast i landsstyret i Noregs Fiskarlag. Ei anna viktig kampsak var rett til ferie for fiskarar, noko som resulterte i Lov om ferie for fiskere i 1972.

Amanda Igland hadde fleire andre verv innan fiskarorganisasjonane, og var medlem av kommunale, fylkeskommunale og regjeringsutnemde utval. Igland sat mange år i Bremanger kommunestyre.

Amanda Igland fekk kongens fortenestmedalje i gull i 1987. Same året fekk Igland kulturprisen for Bremanger kommune.

Havly pensjonat

Rundt 1970 starta Amanda Igland og ektemannen Ulrik Igland pensjonatet Havly. Pensjonatet hadde 11 rom. Tilreisande arbeidarar frå til dømes hamnevesenet og kystverket, var blant dei faste gjestene. Igland dreiv pensjonatet fram til 1998.

Fiskarmonumentet

Som leiar i Bremanger Fiskarkvinnelag fremja Amanda Igland ideen om eit minnesmerke over omkomne på havet. Det vart samla inn pengar til å reise eit monument i stein, laga av bilethoggaren Ståle Kyllingstad. Igland var med på avdukinga av Fiskarmonumentet søndag 6. september 1964.

Sokneprest H.V. Gjeitanger var prest i Bremanger frå 1927 til 1935, og han heldt avdukingstalen. Kunstnaren Kyllingstad sa nokre ord om kunstverket, og Amanda Igland la ned blomar for å minnest og ære dei sakna og omkomne på sjøen. Igland overrekte monumentet til Bremanger kyrkje på vegner av Bremanger Fiskarkvinnelag.

Kjelder

• Kåre Furnes: Fiskarkvinna i 100 år 100 navn. Personer som har preget Nordvestlandet. Sunnmørsposten Forlag 2000
• Kvinnestemmer frå Sogn og Fjordane: Amanda Grotle Igland (1917 – 2002) Arkivert 2016-04-04 ved Wayback Machine.
• Kulturhistorisk leksikon: Fiskarmonumentet i Bremanger Arkivert 2016-03-05 ved Wayback Machine.
• NRK Sogn og Fjordane, Fylkesleksikon: Havly Pensjonat Arkivert 2015-10-10 ved Wayback Machine.
• Kulturprisen for Bremanger kommune