Anton von Werner

Anton Alexander von Werner (9. mai 1843–4. januar 1915) var ein preussisk-tysk historiemålar, fødd i Frankfurt an der Oder.

Anton von Werner
Statsborgarskap	Kongedømet Preussen
Fødd	9. mai 1843 Frankfurt an der Oder
Død	4. januar 1915 (71 år) Berlin
Yrke	kunstmålar, historiemaler
Språk	tysk
Medlem av	Det kongelege svenske kunstakademiet, Association of Berlin Artists
Anton von Werner på Commons

Berlinkongressen, 1881

Liv og gjerning

Werner byrja som lærling i 1857. Frå 1860 studerte han ved Akademie der Künste i Berlin. To år seinare reiste han til akademiet i Karlsruhe og utdanna seg vidare, der han mellom andre hadde Johann Wilhelm Schirmer og Carl Friedrich Lessing til læremeistrar.

27 år gammal tok Werner del i den fransk-prøyssiske krigen, der han var knytt til staben for den Preussens tredje armè. Etter krigen var over i 1871 busette han seg i Berlin. I den tyske hovudstaden arbeidde han frå 1873 som professor ved kunstakademiet i byen. To år seinare, i 1875, rykte han opp og vart direktør for akademiet, Königliche Hochschule der bildende Künste. Seinare var Werner leiar for kunstforeininga i Berlin, og frå 1909 leia han det nasjonale kunstgalleriet i same byen.

Nesten alle dei viktige verka til Werner har tema frå krigen mellom Tyskland og Frankrike i 1870 og -71. Hans mest kjende måleri er Die Proklamation des Deutschen Kaiserreiches (Kunngjeringa av det tyske keisarriket) frå 1876. Motivet er frå Spegelsalen i Versailles, der det tyske keisarriket vart utropt etterfylgd av sabelhelsing frå dei tyske fyrstane som var til stades. Slottet Versailles var hovudkvarter for dei prøyssiske styrkane i Frankrike under sjølve krigen, og vidare, til dess Frankrike hadde betalt krigsskadeserstatning. Heilt inn på 1890-talet henta Werner motiv frå same krigen.

Anton Werner og den norske målaren Hans Gude var nære vener.

Bakgrunnsstoff

Wikimedia Commons har multimedia som gjeld: Anton von Werner

Kjelder

• Denne artikkelen bygger på «Anton von Werner» frå Wikipedia på bokmål, den 15. oktober 2013.