August Christian Baumann

August Christian Baumann (25. mai 1770–3. november 1831) var ein tysk-norsk mineralog, verksstyrar og stortingsmann.

August Christian Baumann
Statsborgarskap	Noreg
Fødd	25. mai 1770 Lüneburg
Død	3. november 1831 (61 år) Kongsberg kommune
Yrke	politikar
Språk	norsk

Baumann var fødd i Bodenteich i Lüneburg i Tyskland. Han utdanna seg til farmasøyt og slo seg i ung alder ned i Kristiania, tok til som provisor ved Elefantapoteket. Etter råd frå Bernt Anker studerte han frå kring 1797 mineralogi, fyrst på Kongsberg, deretter i Falun og var så på rundreise til større tyske bergverk. Ved tilbakekomst til Noreg vart han styrar av bergverk som høyrde til under det Ankerske fideikommiss, med Hakadal Verk som det viktigaste. År 1812 vart han bergmeister i austre sønnafjelske distrikt. Frå 1816 var han ein av leiarane i Kongsberg Sølvverk, verksdirektør frå 1824.

Baumann var opphavleg suppleant (varamann) til Stortinget 1821, men møtte då representanten Kofoed hadde sjukdomsforfall. Han var medlem av sju komitear, mellom anna om bergverkslova, om brannforsikring og om skjønns- og takstmenn.

Han døydde på Kongsberg i 1831.

Kjelder

• Lindstøl, Tallak: Stortinget og Statsraadet 1814-1914. Kristiania, 1914
• Biografisk informasjon om August Christian Baumann NSD Norsk senter for forskningsdatas politikararkiv