Børge Olsen-Hagen

Børge Olsen-Hagen (10. februar 1883–13. september 1936) var ein norsk journalist og politikar frå Stavanger. Han vart stortingsrepresentant for Arbeidarpartiet i åra 1925-1936, vald frå kjøpstadene i Vest-Agder og Rogaland.

Børge Olsen-Hagen
Fødd	10. februar 1883 Stavanger kommune
Død	13. september 1936 (53 år)
Statsborgar av	Noreg
Parti	Arbeidarpartiet
Yrke	politikar, redaktør
Barn	Sølve Harm
Alle verv	stortingsrepresentant (1925–1927) stortingsrepresentant (1928–1930) stortingsrepresentant (1931–1933) stortingsrepresentant (1934–1936)

Olsen-Hagen var son til ein lokomotivførar. Etter han var ferdig med folkeskulen arbeidde han i tekstilindustrien, før han gjekk han Stavanger kommunale handelsskole. Deretter var han handelsbetjent og handelsreisande, til han åra 1909-11 dreiv eiga klesforretning i heimbyen. I 1911 fekk han stilling som redaksjonssekretær i avisa 1ste Mai, og frå 1920 til 1936 var han redaktør i avisa. Frå 1916 var han med i Stavanger bystyre og formannskap. Han var i ni år medlem av skulestyret i Stavanger, også med i fattigstyret.

Både i 1921 og i 1924 vart Olsen-Hagen dømd og fengsla for å ha oppfordra til militærstreik. Då han i 1924 vart vald til stortingsrepresentant frå kjøpstadene i Vest-Agder og Rogaland, sat han i Botsfengselet. Han sona framleis då det nye Stortinget skulle opnast på nyåret. Det førte til eit hardt press mot statsminister Johan Ludwig Mowinckel, og regjeringa Mowinckel gav difor Olsen-Hagen nåde i januar 1925 slik at han kunne møte i Stortinget.

Olsen-Hagen vart attvald både i 1927, 1930 og 1933. Arbeidarparti-mannen var i alle år medlem i Militærkomiteen, som sekretær 1931-33 og nestformann 1934-36. Han var elles medlem av Den parlamentariske valordningskomiteen av 1927 og Den parlamentariske valordningskomiteen av 1935.

Kjelder

• Stortingsbiografi Arkivert 2017-02-27 ved Wayback Machine.