Camilla Henemark
Camilla Maria Skog Henemark (fødd 23. oktober 1964 i Stockholm), òg kalla La Camilla eller LaCamilla, er ein svensk songar, skodespelar, modell, politisk aktivist og førelesar. Ho er best kjend som vokalist i gruppa Army of Lovers.
| Camilla Henemark | |||
 | |||
| Fødd | 23. oktober 1964 | ||
|---|---|---|---|
| Fødestad | Stockholm i Sverige | ||
| Fødenamn | Camilla Maria Skog Henemark | ||
| Alias | La Camilla og LaCamilla | ||
| Opphav | Sverige | ||
| Aktiv | Om lag 1980–i dag | ||
| Sjanger | Pop | ||
| Tilknytte artistar | Army of Lovers | ||
| Verka som | Songar, skodespelar, modell, politisk aktivist og førelesar | ||
Bakgrunn endre
Henemark er dotter av frisøren Gerd Henemark og ein brittisk-nigeriansk advokat. Foreldra møtte kvarandre i England, men Camilla Henemark blei fødd og voks opp i Sverige.[1] Henemark flytta 16 år gammal til eit bukollektiv og byrja studera teater ved Kulturama.[1]
Karriere endre
Modellkarriere endre
Henemark blei oppdaga som fotomodell av Sighsten Herrgård ved ei motevising på Beckmans.[1] På 1980-talet arbeidde ho som modell sjølv og dreiv i tillegg modellbyrået «ZOO – People & Models». I november 1988 var ho avbilda på framsida av engelske trendmagasinet i-D.
Musikalsk karriere endre
Camilla Henemark byrja i musikbranssjen i 1984 som bakgrunnssongar i konseptet Per Cussion All Stars. Nokre år seinare møtte ho disco-transvestitten Barbie (alias Alexander Bard). Ho blei dansar for denne då han byrja samarbeida med frisøren og sminkøren Jean-Pierre Barda. I august 1987 danna desse tre og designeren Camilla Thulin musikkgruppa Army of Lovers. Gruppa hadde stor suksess tidleg på 1990-talet, særleg i Europa, men også i resten av verda. Etter interne kranglar forlét Henemark gruppa i november 1991. Ho har opptredd åleine og samarbeid med artistar som Orup, E-Type, Stakka Bo og Steve Blame. Då etterfølgjaren hennar i Army of Lovers, Michaela de la Cour, forlét gruppa vende Henemark tilbake til gruppa ei kort tid. Army of Lovers blei oppløyst i september 1996 men er blitt gjenoppretta i korte tidsrom i 2001, 2008 og 2013, då gruppa deltok i Melodifestivalen 2013 med songen «Rockin’ The Ride».[2]
Sidan 2011 har Henemark vore medlem i popgruppa Happy Hoes.
Anna verksemd endre
Henemark har medverka i fleire TV-program, spelefilmer, teaterstykke, debattar, radioprogram, TV-såper og i aviser. I 1994 var ho mellom anna programleiar for ein erotisk TV-serie, Sjunde himlen, på svensk TV3. I 1995 spelte ho i Fyra friares fiasko (Love's Labour's Lost) av Shakespeare på Gripsholms slott. I 1997 hadde ho ei rolle i TV-serien Kenny Starfighter. I 2012 deltok ho i Let's Dance på TV4.
Henemark har verka som førelesar for Nationell prevention av suiciditet och psykisk ohälsa (NASP)[3] der ho har teke for seg emne som ADHD, psykiske lidingar og sjølvmordstankar med utgangspunkt i eigne erfaringar.[4][1]
Privatliv endre
Camilla Henemark gifta seg med regissøren Anders Skog i 1988, men dei blei seinare skilde. Ho har også hatt eit langt kjæraste- og vennskapsforhold med Stakka Bo (Johan Renck).[1]
I boka Carl XVI Gustaf - Den motvillige monarken frå 2010 vart det hevda at Camilla Henemark hadde hatt eit forhold til kong Carl XVI Gustaf av Sverige i 1990-åra. Henemark gav i oktober 2012 ut ei memoarbok der ho mellom anna kommenterte påstanden.[1]
Kjelder endre
- Denne artikkelen bygger på «Camilla Henemark» frå Wikipedia på svensk, og «Camilla Henemark» frå Wikipedia på engelsk den 22. juni 2015.
Fotnotar endre
- ↑ 1,0 1,1 1,2 1,3 1,4 1,5 «Camilla Henemark kan själv» (på svensk). SvD.se. 25. mars 2012. Henta 27. november 2012.
- ↑ «De tävlar i Melodifestivalen 2013 – här är alla artister» (på svensk). Sveriges Television. 26. november 2012. Henta 27. november 2012.
- ↑ NASP, Stockholm
- ↑ Camilla Henemark: «Jag funderade på självmord», Expressen, 10. september 2010