Charles Friedek

Charles Michael Friedek (fødd 26. august 1971) er ein tysk tidlegare friidrettsutøvar frå Gießen i Hessen. Han vann VM-gull i tresteghopp under VM i 1999 i Sevilla, same året vann han også innandørs-VM. Friedek var den fyrste svarte friidrettsutøvaren som vart verdsmeister for Tyskland. I 2002 fekk han sølv under EM 2002 i München.

Charles Friedek
Statsborgarskap	Tyskland
Fødd	26. august 1971 (53 år) Gießen
Idrett	friidrett
Tok del i	Sommar-OL 2004, Sommar-OL 2000, Sommar-OL 1996

Aktiv

Friedek deltok i dei olympiske leikane i 1996, 2000 og 2004, utan å hevde seg heilt i toppen. Best vart han i Sydney i 2000 med ein 12. plass. I 1998 gjekk han derimot til topps i trestegtevlinga i verdscupen. Han vann trestegøvinga i verdsmeisterskapen innandørs i 1999, året etter vart han innandørs europameister.

Høgdepunktet for Friedek var verdsmeisterskapen 1999 i Sevilla. Med eit hopp på 17,59 m sikra han seg gullmedaljen, 10 cm lengre enn andremann i tevlinga. Tre år seinare fekk han ein sølvmedalje under friidretts-EM 2002 i München, der svensken Christian Olsson vann med 20 cm margin.

Friedeks siste store triumf kom då han vann tresteg i Europacupen for lag i 2005. Til sommar-OL 2008 i Beijing vart han ikkje teken ut, endå han hadde klart kvalfiseringskravet.

Medaljar og plasseringar i internasjonale meisterskap

• OL 1996 i Atlanta: utslått 16,71 m – nr 14
• VM 1997 i Aten: Nr 11 – 16,86 m
• EM 1998 i Budapest: Nr 6 – 17,04 m
• VM 1999 i Sevilla: Gullmedalje – 17,59 m, framom Rostislav Dimitrov (17,49 m)
• OL 2000 i Sydney: Nr 12
• EM 2002 i München: Sølvmedalje – 17,33 m, bakom Christian Olsson (17,53 m)
• VM i 2005 i Helsingfors: Utslått i kvalifiseringa (15,75 m)
• VM 2009 i Berlin: Uplassert

Kjelder

• Denne artikkelen bygger på «Charles Friedek» frå Wikipedia på tysk, den 2. september 2014.