Hartmut Losch

Hartmut Losch (11. september 1943–26. mars 1997) var ein tysk friidrettsutøvar frå Angermünde i forbundslandet Brandenburg, som representerte Aust-Tyskland. Han vart europameister i diskoskasting i 1969, tre år tidlegare tok han sølvmedaljen i same øvinga, også då i EM. 192 cm høge og 120 kg tunge Losch var medlem av ASK Potsdam, og døydde i Potsdam.

Hartmut Losch
Statsborgarskap	Tyskland, Den tyske demokratiske republikken
Fødd	11. september 1943 Angermünde
Død	26. mars 1997 (53 år) Neu Fahrland
Yrke	friidrettsutøvar
Språk	tysk
Høgd	192 centimeter
Hartmut Losch på Commons

Aktiv

Losch sette personleg rekord med 58,38 meter i 1964. Han deltok for Tyskland under sommar-OL i Tokyo, og kvalifiserte seg til finalen med eit kast på 56,56 m. I finalen måtte han nøye seg med 52,08 m og ellevteplass. To år seinare kom han på sølvplassen i EM 1966 i Budapest. I ei uvanleg jamn tevling oppnådde han 57,34 m og mangla åtte centimeter på vinnarkastet til landsmannen Detlef Thorith.

Til liks med dei aller fleste andre, samtidige diskoskastarar forbetra Losch den personlege rekorden med fleire meter i desse åra kring 1970. I OL-sesongen 1968 persa han med 62,72 m. Han kasta opp mot den personlege rekorden under dei olympiske leikane i oktober og vart nummer fire i øvinga. I 1969 lukkast Losch å verte europameister i diskos, vinnarkastet i Aten målte 61,82 m. To år seinare forbetra han persen til 63,76 m. I den same sesongen kom han på femteplass i EM i Helsingfors.

Losch heldt fram å forbetre den personlege rekorden, i 1972 til 64,36 m. Men under OL i München var han langt unna å nå finalen. I 1974 kasta han 63,88 m, men kom ikkje med i Aust-Tysklands tropp til EM i Roma.

Medaljar og plasseringar i internasjonale meisterskap

• OL 1964 i Tokyo: Nr 11 – 52,08 m
• EM 1966 i Budapest: Sølvmedalje – 57,34 m, bakom Detlef Thorith (57,42 m)
• OL 1968 i Mexico by: Nr 4 – 62,12 m
• EM 1969 i Aten: Gullmedalje – 61,82 m, framom Ricky Bruch frå Sverige (61,08 m)
• EM 1971 i Helsingfors: Nr 5 – 60,86 m
• OL 1972 i München: Utslått i kvalifiseringa (56,64 m, nr 22)

Kjelder

• Friidrott, ymse årgangar. Hälsingborg

• Denne artikkelen bygger på «Hartmut Losch» frå Wikipedia på tysk, den 20. august 2013.