Herman Fjelde
Herman Olaus Fjelde (13. april 1866–14. juli 1918) var ein norsk-amerikansk lækjær og kulturaktivist.
| Herman Fjelde | |
| Fødd | 13. april 1866 |
| Død | |
| Yrke | lege |
Fjelde var fødd i Ålesund og utvandra 1889 til USA. Seks år etter han var komen til landet, avla han medisinsk embetseksamen i Minneapolis. Han praktiserte først ei tid i ein småby i delstaten Wisconsin. Deretter verka han i Abercrombie i Nord-Dakota i 15 år. Sidan var han lækjar i den større byen Fargo i same delstaten fram til 1917.
Fjelde er mest kjend for det omfattande arbeidet han la ned for norsk kultur i USA. Han skipa til stemner og gjorde opptaket til å reise minnesmerke over Ivar Aasen og Hans Nielsen Hauge på Concordia College i Moorhead i Minnesota. Han stod også bak reisinga av eit Bjørnson-monument i Fargo i 1904, og Wergeland-statuen same stad i 1908. Dessutan var han initiativtakar til gåva frå norsk-amerikanarane til Noreg ved grunnlovsjubileet i 1914, og Lincoln-bysten i Oslo. Fjelde var elles ein aktiv skribent og organisasjonsleiar. I 1910 var han med og stifta Søndmørslaget i Amerika og vart lagets første formann.
Jakob Fjelde var ein eldre bror.
Herman Fjelde døydde i Rolla i Nord-Dakota.
Kjelder
endre- Norsk Allkunnebok, IV. Bandet. 1952.
- Norsk Biografisk Leksikon.