Jøssing

Jøssing var eit namn på norske motstandarar av nazismen under andre verdskrigen. Namnet kjem av stadnamnet Jøssingfjord, ein fjord i Rogaland der engelske marinestyrkar den 16. februar 1940 borda den tyske hjelpekryssaren Altmark og frigjorde 300 engelske fangar.

Motortorpedobåtane, MTB-619 og MTB-717, bygd i Storbritannia i 1942 og 1944, tok «Jøssingen» som patriotisk kallenamn. Biletet viser eit våpenskjold der motivet er ein norsk fjøsnisse i raud topplue som rir på ein torpedo, her symbol for det norske folk og motstandsrørsla.

Foto: Frå utstilling i Forsvarsmuseet, 2019

Etter det vart namnet jøssing nytta av nazistane som nedsetjande nemning for engelskvennlege nordmenn, visstnok fyrste gong i ein artikkel i det svenske naziorganet Sverige Fritt 31.01.1941, sidan i NS-avisa Fritt Folk 18.02.1941 og lansert som nedsetjande nemning for alle engelskvennlege i Noreg i håp om at det ville nøytralisere skjellsordet quisling. Jøssing vart straks annektert av norske antinazistar som ei heidersnemning.

Sjå òg

• Altmark-saka

Bakgrunnsstoff

• Norsk Krigsleksikon om jøssing