Johannes Christian Piene
Johannes Christian Piene (19. august 1832–2. juli 1912) var ein norsk industrileiar, kjøpmann og politikar frå Trondheim. Han var ein av dei fremste industribyggjarane i Trøndelag på 1800-talet, og var involvert i mellom anna mylnebruk, Trondhjems Mekaniske Værksted og Ranheim Cellulosefabrik. Piene var både lokalpolitikar og stortingsmann for Høgre.
| Johannes Christian Piene | |||
 | |||
| Fødd | 19. august 1832 Trondheim | ||
|---|---|---|---|
| Død | 2. juli 1912 (79 år) | ||
| Statsborgar av | Noreg | ||
| Parti | Høgre | ||
| Yrke | politikar, handelsmannn, gründer | ||
| Alle verv |
| ||
Bakgrunn og yrkeskarriere
endrePiene var son til ein kjøpmann og fabrikkeigar i Trondheim. Biskop Peder Bugge var morfaren hans. Sjølv tok han handelsutdanning i inn- og utland, og vart så medeigar i faren sin bandfabrikk, ei verksemd som i hovudsak produserte band, lisser og snorer for eksport til Sverige. Fabrikken var lenge det einaste tekstilfirmaet i Trondheim. Firmaet vart lagt ned i 1906, etter at lønnsemda forsvann då mellomrikslova vart oppheva.
Piene grunnla grossistfirmaet I.C. Piene & Søn i 1866, og tok borgarskap året etter. I 1866 kjøpte han mylna på Ila i Trondheim, og i 1878 grunnla han Hammerstrand Mølle i Buvika. Piene sørga for teknisk modernisering i verksemda, og var mellom dei første som selde finmala og sammala mjøl i landet. Han dreiv også omfattande import av korn og ulike formalingsprodukt. Piene sitt firma vart snart leiande innan mjølhandelen nordafjells.
Han var styremedlem i Trondhjems Mekaniske Værksted 1885–1903, ein del av tida også styreformann. Medan han var formann vart anlegget mykje skadd i ein brann, han greip då sjansen og fekk flytta verksemda frå Bakklandet til det langt gunstigare utløpet av Nidelva. Piene var også styreformann og største aksjonær i Ranheim Cellulosefabrik, styremedlem i Den Nordenfjeldske Kreditbank og frå 1891 ordførar i Trondhjems Sparebank sitt forstandarskap.
Politikk
endreI 1883 var Piene med på å grunnlegge Grundlovsforeningen i Trondhjem, ein forløpar for landspartiet Høgre. Han var ein leiarfigur i det lokale Høgre-miljøet og representerte partiet i Trondheim bystyre og formannskap, og var vald inn på Stortinget frå Trondhjem og Levanger 1892–94. Piene var tilsynsmann ved bygginga av Meråkerbanen 1894–1905, medlem av den kongelege tollkommisjonen 1879-80 og medlem av børskommisjonen 1882-98.
Piene vart utnemnd til riddar av 1. klasse av St. Olavs Orden i 1891, og var æresmedlem av Trondhjems Handelstands Forening.
Kjelder
endre- Lindstøl, Tallak: Stortinget og Statsraadet 1814-1914. Kristiania, 1914
- Denne artikkelen bygger på «Johannes Christian Piene» frå Wikipedia på bokmål, den 11. april 2014.