John Atkinson Grimshaw
John Atkinson Grimshaw (6. september 1836–31. oktober 1893) var ein britisk målar frå viktoriatida som var sterkt påverka av prerafaelittane og noko av estetisismen. Han var særleg kjend for å måla byscener på nattetid og landskap.
| John Atkinson Grimshaw | |
 | |
| Statsborgarskap | Det sameinte kongeriket Storbritannia og Irland |
| Fødd | 6. september 1836 Leeds |
| Død |
13. oktober 1893 (57 år) |
| Yrke | kunstmålar |
| Sjanger | landskapsmåleri, mytologisk maleri |
| Born | Arthur Edmund Grimshaw |
| John Atkinson Grimshaw på Commons | |
Liv og gjerning
endre
.jpg)
Grimshaw var fødd og døydde i Leeds. Han var son til ein politimann, og fekk inga formell kunstutdanning, med lærde seg opp på eigenhand. I yngre år hadde han fast kontorstilling i jarnbanen, før han i 1861 slutta i yrket og satsa fullt ut som målar, noko som skaka opp foreldra hans. Hans tidlege verk var helst stilleben med daude småfuglar, blomar og frukt, i ein stil som minner om verk av landsmannen William Henry Hunt. Medlemer av Leeds Philosophical and Literary Society var mellom hans fyrste kundar, noko som gav han ry på heimstaden og sette han i stand til å busette seg i ein av dei rikare bydelane i Leeds.
Frå 1862 byrja Grimshaw å stille ut verka sine i London, mellom anna viste han fram fem måleri på ei av Royal Academy of Arts sine utstillingar. Gjennom åra utvikla han ein særeigen stil, noko dei mange disige by- og hamnemotiva i skumringa, natte- og haustscenene vitnar om. Grimshaw måla gatescener frå byar og forstader og måneopplyste bilete frå hamnene i London, Leeds, Liverpool og Glasgow. Han jobba mykje med lyseffekt, og mange av scenene var lyssette av lys inne frå bygningar, dei moderne gatelysa ein hadde byrja ta i bruk, eller i nokre høve av brannar. Grimshaw måla også portrett, interiørbilete, bilete av feer og litterære bilete inspirerte av verka til Longfellow og Tennyson. Hans kommersielle suksess gjorde at han i 1870 kunne flytte inn Knostrop Old Hall, eit herskapshus nær Leeds, og leiga eit andre husvære i kystbyen Scarborough. Midt i 1880-åra arbeidde han over eit kort tidsrom i eit atelier i Chelsea i London, ikkje langt frå det til den amerikanske impresjonisten James Whistler.
Grimshaw gifta seg med syskenbarnet sitt Frances Hubbard (1835–1917) i 1856. Dei hadde femten born; av desse voks ni opp, og fleire blei målarar: Arthur Grimshaw (1864–1913), Louis H Grimshaw (1870–1944), Wilfred Grimshaw (1871–1937) og Elaine Grimshaw (1877–1970).
John Atkinson Grimshaw døydde i 1893 av tuberkulose. Han blei gravlagd i Woodhouse Cemetery (no St George's Fields) i Leeds.
Galleri
endre-
Whitby Harbor, 1874 -
The Lady of Shalott, ca. 1875 -
Il Penseroso, 1875 -
Two Thousand Years Ago, 1878 -
The Cradle Song, 1878 -
Evening Glow, ca. 1884 -
Søndagskveld på Knostrop Cut i Leeds, 1893
Kjelder
endre- http://www.atkinsongrimshaw.co.uk/ Arkivert 2017-05-15 ved Wayback Machine.
- Denne artikkelen bygger på «John Atkinson Grimshaw» frå Wikipedia på tysk, den 14. desember 2013.
- Delar av denne artikkelen bygger på «John Atkinson Grimshaw» frå Wikipedia på engelsk, den 22. mars 2014.
- Wikipedia på engelsk oppgav desse kjeldene:
- Lionel Lambourne, Victorian Painting, London, Phaidon Press, 1999
- Alexander Robertson, Atkinson Grimshaw, London, Phaidon Press, 1996 ISBN 0-7148-2525-5
- H.J. Dyos and Michael Wolff, eds., The Victorian City: Images and Realities, 2 Volumes, London, Routledge, 1973.
- Christopher Wood, Victorian Painting, Boston, Little, Brown & Co., 1999
Bakgrunnsstoff
endre- Artiklar om bileta til Grimshaw Arkivert 2015-04-02 ved Wayback Machine. i Yorkshire Art Journal (yorkshireartjournal.com)
- Atkinson Grimshaw (1836-93): An Overview ved The Victorian Web (victorianweb.org)
- John Atkinson Grimshaw. Biletgalleri ved illusionsgallery.com