Kalevi Kotkas

Kalevi Kotkas (10. august 1913–24. august 1983) var ein estiskfødd finsk friidrettsutøvar fødd i Tallinn. Han var ein av verdas beste i såvel høgdehopp som diskoskasting. I 1934 vann han EM-gull i høgdehopp, fire år seinare fekk han EM-sølv i same øvinga. Kotkas var ein stor og kraftig kar på 194 centimeter, vog 100 kg.

Kalevi Kotkas
Statsborgarskap	Estland, Finland
Fødd	10. august 1913 Tallinn
Død	24. august 1983 (70 år) Vanda
Idrett	friidrett
Tok del i	Sommar-OL 1936, Sommar-OL 1932

Liv og virke

Kotkas flytta til Finland med mor si før 1920 og fekk finsk statsborgarskap i 1932. I landskampen mot Noreg på Bislett stadion i Oslo i juli 1933 sette han sin fyrste finske rekord, med eit diskoskast på 49,64 meter. Med saksestil svinga han seg den 7. mars 1934 over 2,01 meter ved eit stemne i Rio de Janeiro, ingen europear hadde tidlegare gått over 2 meter. Ved EM i friidrett 1934 i Torino vart Kotkas den aller fyrste europameisteren i friidrett. Som den einaste smaug han seg over 2,00 m. Ein hofteskade plaga han under Sommar-OL 1936 i Berlin, der han vart fjerdemann i høgdehopp.

1. september 1936 sette Kotkas europarekord i høgdehopp med 2,04 meter i Göteborg. Resultatet vart verande europeisk rekord i 17 år og finsk rekord i 20 år. Sommaren 1937 vart han den fyrste finlendaren som nådde 50-metersgrensa frå diskosringen. Hans aller lengste diskoskast kom 18. august i Helsinki og mælte 51,27 meter, finsk rekord til 1954. Under EM i friidrett 1938 i Paris deltok Kotkas i både høgdehopp og diskoskast, to tevlingar som gjekk føre seg om lag samstundes. Dagen enda med sølvmedalje i høgdehopp og fjerdeplass i diskoskast.

Kotkas var finsk meister i diskoskasting seks år i rad: 1933-38, og fem år i rad i høgdehopp: 1934-38

Kjelder

• Denne artikkelen bygger på «Kalevi Kotkas» frå Wikipedia på finsk, den 9. juni 2024.