Peder Aslak Owren
Peder Aslak Berntsson Owren, også kjend som P.A. Owren, (7. desember 1876–5. juni 1954) var ein gardbrukar frå Fåberg i Oppland som representerte Oppland fylke og Arbeiderdemokratene på Stortinget i perioden 1925-27, møtte òg som varamann i både 1919 og 1920.
| Peder Aslak Owren | |
| Statsborgarskap | Noreg |
| Fødd | 7. desember 1876 Fåberg kommune |
| Død | |
| Yrke | bonde, politikar |
| Politisk parti | Arbeiderdemokratene |
Owren var son til ein gardbrukar. Sjølv gjekk han Elverum ungdomsskole i 1892/93 og tok eksamen ved landbruksskulen på Hove i Fåberg i 1899. I 1901 tok han over farsgarden Lekshus i bygda Mesna, ein gard han dreiv til 1932. Jamsides gardsdrifta sysla han med skog- og tømmerhandel til 1914, medan han i tida 1911-26 dreiv eit dampysteri med landhandel. Då han i 1932 skøytte garden over på eldste sonen, starta han opp ein pelsdyrfarm med avl av sølv- og platinarev.
Periodane 1913-22 og 1925-28 var Owren ordførar i Fåberg herad. Han var også formann i det kommunale skogutvalet. Valbolken 1919-21 var han 1. varamenn til Stortinget frå einmannskrinsen Søndre Gudbrandsdalen. Han møtte då fire gongar i staden for Johan Castberg, den valde representanten, som var medlem i Justiskomiteen. Owren lukkast ikkje å kome inn på Stortinget 1922-24, men nådde opp gjennom Stortingsvalet 1924. Han var såleis medlem i Militærkomiteen i tingbolken 1925-27.
Elles var Owren formann 1918-21 i skattetakstkomiteen for Oppland fylke, medlem 1923-37 i tilsynsnemnda (styret) for Oppland fylkessjukehus og 1929-32 i tilsynskommisjonen for Eidsvoll-, Rauma-, Dovrebanen. I tida 1940-44 og 1945-?? var han formann i Norges Pelsdyrlag.
Kjelder endre
- Biografisk informasjon om Peder Aslak Owren NSD Norsk senter for forskningsdatas politikararkiv